لاہور: وزیر داخلہ پنجاب نے پریس کانفرنس میں چوہدری مسعود کا استعفی لہرا دیا، انھوں نے پیسے دینے کے الزامات کی تردید کرتے ہوئے کہا کہ یہ استعفیٰ تو اپریل میں دیا گیا تھا۔
تفصیلات کے مطابق وزیر داخلہ پنجاب عطا تارڑ نے گزشتہ روز پریس کانفرنس میں پی ٹی آئی رکن چوہدری مسعود کا استعفی لہرا دیا، تاہم یہ بات بھی سامنے آئی ہے کہ چوہدری مسعود کا استعفیٰ تاحال پارٹی چیئرمین عمران خان اور اسپیکر پنجاب اسمبلی کو موصول نہیں ہوا ہے، اس لیے استعفے سے متعلق سوال اٹھ گئے ہیں۔
عطا تارڑ نے استعفیٰ لہرا کر مسعود مجید سے متعلق خبر کی تصدیق کر دی ہے، اے آر وائی نیوز چوہدری مسعود کے ترکی جانے کے ثبوت بھی سامنے لے آیا ہے، ترکی میں ارکان کو ٹھہرانے کے لیے ہوٹل بُک کیے گئے ہیں، رہنما تحریک انصاف فواد چوہدری کہتے ہیں کہ مسعود مجید نامی ایم پی اے کو پیسے دے کر ترکی پہنچایا گیا۔
ادھر عطا تارڑ نے پریس کانفرنس میں کہا پی ٹی آئی ارکان کو پیسے نہیں دیے، مسعود مجید نے اپریل میں ہی استعفیٰ دے دیا تھا، پی ٹی آئی والوں کو اپنے ہی رکن اسمبلی کا پتا نہیں، کسی کو پیسے دینا ثابت ہو جائے تو سیاست چھوڑ دوں گا۔
تحریک انصاف کے ایم پی اے چوہدری مسعود کے ترکی جانے کے ثبوت سامنے آگئے
واضح رہے کہ مسعود مجید نے 3 اپریل بروز اتوار کو ڈپٹی اسپیکر پنجاب اسمبلی کو استعفے پر مبنی خط لکھا تھا، جس میں انھوں نے بتایا کہ پنجاب حکومت میں کچھ حلقوں کی جانب سے ان کے لیے رکاوٹیں کھڑی کی گئیں، ایسے حالات میں پرفارم نہیں کر سکتا، PP-257 کا نمائندہ ہوتے ہوئے میرا شعور مجھے اصولوں کے خلاف جانے کی اجازت نہیں دیتا اس لیے میرا استعفیٰ منظور کیا جائے۔
دوسری طرف اے آر وائی نیوز چوہدری مسعود کے ترکی جانے کے ثبوت سامنے لے آیا ہے، چوہدری مسعود صبح 3 بج کر 27 منٹ پر لاہور سے استنبول کے لیے روانہ ہوئے، ایئر پورٹ ذرائع کے مطابق چوہدری مسعود ترکش ایئر لائن کی پرواز ٹی کے سیون ون فائیو سے روانہ ہوئے۔
’اللہ گواہ ہے پی ٹی آئی کے کسی رکن کو آفر نہیں کی‘
فواد چوہدری کا کہنا ہے کہ عطا تارڑ فون کر کے ہمارے ایم اپی ایز خریدنے کی کوشش کر رہے ہیں، ایم پی ایز کو کہہ رہے ہیں آپ بس بیرون ملک چلے جائیں۔
