اسلام آباد: وفاقی وزیر برائے اطلاعات عطا تارڑ کا کہنا ہے کہ شاہد خاقان عباسی اور مفتاح اسماعیل نے کنجوسی سے کام لیا جہاں تعریف بنتی تھی وہاں تو کردیتے۔
اے آر وائی نیوز کے مطابق وفاقی وزیر اطلاعات عطا تارڑ نے نیوز کانفرنس کرتے ہوئے کہا کہ شاہد خاقان عباسی کی اپنی ایئرلائن ہے انہیں پی آئی اے کی نجکاری کا ذکر تو کرنا ہی چاہیے تھا۔
عطا تارڑ نے کہا کہ شاہدخاقان عباسی کا اراکین قومی و صوبائی اسمبلی کو ترقیاتی اخراجات کی مد میں 500 ارب روپے دینے کا دعویٰ غلط ہے۔
انہوں نے کہا کہ پی ایس ڈی پی ہی کا حجم ہی 1500 ارب روپے ہے، ہمارے سابق ساتھیوں نے غلط اعدادوشمار پیش کیے، شاید انہوں نے کتاب غلط پڑھی۔
وفاقی وزیر نے کہا کہ مفتاح اسماعیل وزیر خزانہ تھے تو مہنگائی بہت زیادہ تھی، اب کم ہوئی ہے تو تعریف بنتی تھی۔
عطا تارڑ کا کہنا تھا کہ کابینہ اراکین اور وزیراعظم نہ مراعات لیتے ہیں نہ تنخواہ، محکمے ختم اور ضم کیے جارہے ہیں یہ اخراجات میں کمی نہیں تو اور کیا ہے۔
واضح رہے کہ اس سے قبل سابق وزیراعظم شاہد خاقان عباسی نے مفتاح اسماعیل کے ہمراہ نیوز کانفرنس کرتے ہوئے وفاقی بجٹ پر نظرثانی کا مطالبہ کیا تھا۔
ان کا کہنا تھا کہ 500 ارب روپے ایم این اے اور ایم پی ایز کو بانٹے جائیں گے، سیاسی فوائد حاصل کرنے والے کو پیسے دیے جائیں گے، کیا ایف بی آر کو پتا نہیں کہ سگریٹ کتنے بنتے ہیں اور کیا ٹیکس لیتے ہیں؟
شاہد خاقان کا کہنا تھا کہ پاکستان کا سب سے بڑا خرچہ سود کی ادائیگی ہے، ڈیزل کی اسمگلنگ کو کوئی نہیں چھیڑے گا، فاٹا میں فیکٹریاں فاٹا کے عوام کو فائدہ نہیں دیتیں، فاٹا پاکستان کا حصہ ہے اس پر ٹیکس لگایا جائے کیوں کہ یہ فیکٹریاں فاٹا کے عوام نہیں لگاتے۔
سابق وزیر خزانہ مفتاح اسماعیل کا کہنا تھا کہ ڈیزل اور ایل پی جی کی اسمگلنگ روک کر ٹیکس جمع کریں تو کوئی اور ٹیکس لینے کی ضرورت نہ پڑے۔
