لاہور : انسداددہشت گردی عدالت نے پی ٹی آئی کے مرکزی صدر پرویز الٰہی عبوری ضمانت خارج کرتے ہوئے حاضری معافی کی درخواست مسترد کردی۔
تفصیلات کے مطابق لاہور انسداددہشت گردی عدالت میں پی ٹی آئی کے مرکزی صدر پرویز الٰہی کے گھر پولیس ریڈ کے دوران مزاحمت اور پولیس پر حملے سے متعلق مقدمے کی سماعت ہوئی۔
انسداد دہشت گردی عدالت کےجج اعجاز احمد بٹرنےکیس پر سماعت کی ،عدالت نے پرویز الٰہی کی غالب مارکیٹ مقدمہ میں عبوری ضمانت خارج کرتے ہوئے حاضری معافی کی درخواست مسترد کردی۔
انسداد دہشت گردی عدالت نے پرویز الٰہی کی میڈیکل بنیاد پر حاضری معافی کی درخواست مسترد کی۔
پرویزالٰہی کےوکیل کی جانب سےحاضری معافی کی درخواست جمع کرائی گئی تھی ، جس میں کہا گیا تھا کہ غالب مارکیٹ پولیس نے پولیس پرحملہ کرنے کابے بنیاد الزام لگایا، ٹرائل کے حتمی فیصلے تک ضمانت قبل از گرفتاری بھی منظور کی جائے۔
یاد رہے پی ٹی آئی کے مرکزی صدر پرویزالٰہی کے خلاف دہشت گردی سمیت مختلف دفعات کے تحت مقدمہ درج کیا گیا تھا۔
مقدمہ تھانہ غالب مارکیٹ میں دہشت گردی،اقدام قتل سمیت 13 دفعات کے تحت درج کیا گیا، مقدمے میں چوہدری پرویز الٰہی سمیت 19 افراد کو نامزد کیا گیا۔
پولیس نے بتایا تھا کہ مقدمہ اینٹی کرپشن انسپکٹرکی مدعیت میں درج کیا گیا ، ایف آئی آر میں کہا گیا ہے کہ اینٹی کرپشن ٹیم نے پرویز الٰہی کی گرفتاری کیلئےان کی رہائشگاہ پرچھاپہ مارا، رہائشگاہ کے اندر موجود 40 سے 50 افراد نے پتھراؤاور تشدد شروع کردیا۔
