لاہور: سابق وزیر اعظم عمران خان پر قاتلانہ حملے کے سلسلے میں وزیر آباد سے ایک اور شخص کو حراست میں لے لیا گیا ہے۔
تفصیلات کے مطابق وزیر آباد سے عمران خان پر قاتلانہ حملے کے الزام میں ایک اور شخص کو حراست میں لیا گیا ہے، پولیس ذرائع کا کہنا ہے کہ حراست میں لیا جانے والا شخص حملہ آور نوید کا قریبی عزیز ہے۔
پولیس ذرائع کے مطابق حملہ آور نوید نے حملے سے پہلے موٹر سائیکل اس شخص کی دکان پر کھڑی کی تھی، حراست میں لیے جانے والے شخص سے تفتیش جاری ہے۔
واضح رہے کہ چیئرمین تحریک انصاف عمران خان پر قاتلانہ حملے کے الزام میں اب تک 4 افراد کو حراست میں لیا جا چکا ہے۔
عمران خان پر قاتلانہ حملہ: تحریک انصاف کا آج شام پھر ملک گیر احتجاج کا اعلان
یاد رہے کہ جمعرات 3 نومبر کو وزیر آباد میں لانگ مارچ کے دوران کنٹینر پر فائرنگ سے عمران خان زخمی ہو گئے تھے، ڈاکٹرز کی رپورٹ کے مطابق ان کی ٹانگ میں گولیاں لگیں۔
ذرائع کا کہنا ہے کہ عمران خان تاحال شوکت خانم اسپتال ميں زير علاج ہیں تاہم ان کی طبیعت پہلے سے بہتر ہے، ڈاکٹروں کا بورڈ آج عمران خان کا مکمل چیک اپ کرے گا، دوبارہ ایکسرے اور ٹیسٹ کیے جائیں گے، اور 24 گھنٹے میں اسپتال سے ڈسچارج کیے جانے کا امکان ہے۔
