The news is by your side.

Advertisement

میانمار: آنگ سان سُو چی کو 4 نئے الزامات کا سامنا

میانمار: معزول رہنما آنگ سان سُوچی کو بدعنوانی کے 4 نئے الزامات کا سامنا ہے۔

تفصیلات کے مطابق میانمار کی معزول قائد آنگ سان سُو چی کے وکلا نے بتایا ہے کہ استغاثہ نے ان پر بدعنوانی کے چار نئے مقدمات قائم کیے ہیں۔

وکلا نے منگل کے روز بتایا کہ نئے الزامات سے متعلق عدالتی کارروائی کا آغاز 22 جولائی سے ہوگا، لیکن وہ ان کی تفصیلات سے لا علم ہیں کیوں کہ متعلقہ دستاویزات تک ان کی رسائی نہیں ہے۔

ملک کے سرکاری میڈیا نے گزشتہ ماہ اطلاع دی تھی کہ محترمہ سُو چی نے ایک علاقائی حکومتی عہدے دار سے 6 لاکھ ڈالر نقد اور تقریباً 11 کلوگرام سونا وصول کیا تھا۔ میڈیا کے مطابق انھوں نے اپنے عہدے کا غلط استعمال کرتے ہوئے، اپنے ایک ادارے کے ذریعے مارکیٹ ریٹ سے کم پر جائیدادیں کرائے پر دی تھیں۔

نئے مقدمات کا تعلق اِن الزامات سے ہو سکتا ہے، واضح رہے کہ سابق اسٹیٹ کونسلر پر پہلے ہی 6 مقدمات میں فرد جرم عائد کی جا چکی ہے۔ 5 الزامات کے تحت مقدمات کی کارروائی شروع ہو چکی ہے، تاہم ان کی پیش رفت وکلا کی توقع سے سست ہے کیوں کہ استغاثہ اضافی شہادتیں جمع کروا رہا ہے۔

میڈیا رپورٹس میں کہا گیا ہے کہ مزید الزامات کے ذریعے فوج، بظاہر آنگ سان سو چی کی حراست کو طول دینے کی کوشش کر رہی ہے۔

Comments

یہ بھی پڑھیں