پاکستان اور آسٹریلیا کے درمیان ٹی ٹوئنٹی سیریز کا آغاز آج سے برسبین میں ہوگا، میچ سے قبل شائقین کرکٹ کے لئے ایک بری خبر بھی ہے۔
آسٹریلوی محکمہ موسمیات کے مطابق دوپہر ایک بجے بارش کا امکان ہے، جس کے باعث برسبین میں پاکستان اور آسٹریلیا کا ٹی ٹوئنٹی میچ متاثر ہونے کا خدشہ ہے۔
پاکستان کی جانب سے محمد رضوان ٹی ٹوئنٹی انٹرنیشنل میں پاکستان ٹیم کی قیادت کرنے والے 12 ویں کپتان ہونگے۔
رضوان کا کہنا ہے کہ تیاری اچھی ہے، فائنل الیون سے متعلق وہی فیصلہ کیا جائے گا جو بہتر ہوگا۔
جوش انگلس سیریز میں آسٹریلیا کی قیادت کریں گے، آسٹریلیا کو مچل اسٹارک، جوش ہیز ل ووڈ، مستقل کپتان مچل مارش اور اوپنر ٹریوس ہیڈ کی خدمات حاصل نہیں ہوں گی۔
محکمہ موسمیات کا کہنا ہے کہ دن بھر بارش ہوسکتی ہے، جبکہ ہلکی ہوا چلنے کا بھی امکان ہے جبکہ پہلا ٹی ٹوئنٹی میچ پاکستانی وقت کے مطابق دوپہر ایک بجے شروع ہوجائے گا۔
دوسری جانب پاکستان نے آسٹریلیا کو اسی کی سر زمین پر ون ڈے سیریز میں شکست دینے کے ساتھ ایک اور بڑا ریکارڈ اپنے نام کر لیا ہے۔
پاکستان نے آسٹریلیا کو اسی کی سر زمین پر تین ون ڈے میچوں پر مشتمل سیریز میں دو، ایک سے شکست دے کر کینگروز کے دیس میں 22 سال بعد یہ کارنامہ انجام دیا۔ اس کے ساتھ ہی گرین شرٹس آسٹریلیا میں ایشیا کی سب سے کامیاب کرکٹ ٹیم بن گئی ہے۔
اس سے قبل وقار یونس کی قیادت میں گرین شرٹس نے آسٹریلیا کو 2002 میں ون ڈے سیریز میں شکست دی تھی۔
سیریز میں اس فتح کے ساتھ ہی پاکستان، انگلینڈ اور جنوبی افریقہ کے بعد دنیائے کرکٹ کی تیسری ٹیم بن گئی ہے جس نے کینگروز کو اسی کی سر زمین پر دو طرفہ ون ڈے سیریز میں دوسری بار شکست دی ہے۔
چیمپئنز ٹرافی: محسن نقوی ڈٹ جائیں تو پاکستان کی جیت ہوگی، باسط علی
اس کے ساتھ ہی پاکستان خطہ ایشیا کی پہلی ایسی ٹیم بن گئی ہے جس نے کرکٹ کی سپر پاور کو دو بار اسی کی سر زمین پر زیر کرنے کی ہمت کی ہے۔
