اسلام آباد: وفاقی وزیر توانائی اویس خان لغاری نے وزیر اعلیٰ خیبر پختونخوا علی امین گنڈا پور کو خط لکھ کر بجلی چوری کی روک تھام سے متعلق ملاقات کیلیے وقت مانگ لیا۔
وفاقی وزیر اویس لغاری نے اعلی امین گنڈاپور کے نام خط میں لکھا کہ ملاقات میں مشترکہ حکمت عملی کے ذریعے صورتحال میں بہتری پر غور کیا جائے گا۔ انہوں نے مطالبہ کیا کہ خیبر پختونخوا میں بجلی چوری روکنے کیلیے پولیس کی مدد فراہم کی جائے۔
اویس لغاری نے کہا کہ پولیس کی مدد سے صوبے میں بجلی چوری کے خلاف مہم کو کامیاب بنایا جا سکتا ہے، پولیس کے تعاون کیلیے آپ سے ذاتی دلچسپی لینے کی درخواست کرتا ہوں، صوبے میں آپریٹ کرنے والی پیسکو اور ٹیسکو خراب کارکردگی والی ڈسکوز میں شامل ہیں۔
خط میں انہوں نے لکھا کہ رواں مالی سال کیلیے پیسکو اور ٹیسکو کے نقصانات کا تخمینہ 188 ارب لگایا گیا ہے، بجلی چوری روکنے، نقصانات کم اور وصولیوں میں بہتری کیلیے ملک گیر مہم شروع کی ہے۔
ان کا کہنا تھا کہ مہم کی کامیابی کا دارو مدار صوبائی حکومتوں کے تعاون پر منحصر ہے، نقصانات نے پاور سیکٹر کی پائیداری پر سوالیہ نشان کھڑا کر دیا ہے، ٹیسکو کے زیرِ انتظام علاقوں میں کمزور حکومتی عملداری کا چیلنج درپیش ہے۔
وفاقی وزیر نے لکھا کہ ممکنہ حل میں ٹیسکو کے علاقوں میں ریکوری کیلیے صوبائی حکومت جامع پلان مرتب کرے، دوسرا ممکنہ حل ہے کہ صوبائی حکومت ٹیسکو کے علاقوں میں پاور سپلائی کا بیڑا اٹھا لے۔
