اے آر وائی کا ڈرامہ ’جان جہاں‘ کل سے نشر ہونے جارہا ہے، عائزہ خان نے ڈرامے کے لیے منفرد انداز میں اپنے جذبات کا اظہار کیا ہے۔
حمزہ علی عباسی اور عائزہ خان کی جوڑی کو ایک بار پھر سے اسکرین پر دیکھنے کے لیے مداح بے صبری سے انتظار کررہے تھے اور ان کا یہ انتظار کل ختم ہونے جارہا ہے۔ عائزہ خان نے بھی مداحوں کو مخاطب کرتے ہوئے سوشل میدیا پر ڈرامے کے حوالے سے پیغام جاری کیا ہے۔
اداکارہ نے انسٹاگرام پر ’جان جہاں‘ کے حوالے سے پوسٹ شیئر کرتے ہوئے لکھا کہ ’ملیے ماہ نور سے بس ایک دن بعد‘۔ ساتھ ہی انھوں نے ڈرامے کا ہیش ٹیگ بھی استعمال کیا۔
سوشل میدیا پوسٹ کے ساتھ عائزہ خان نے اپنی متعدد تصاویر بھی شیئر کی ہیں، جس میں وہ دیے جلاتی نظر آرہی ہیں۔ مداح ان کی تصاویر کو بے حد پسند کررہے ہیں۔
واضح رہے کہ اے آر وائی ڈیجیٹل کے نئے ڈرامہ سیریل ’جانِ جہاں‘ میں اداکار حمزہ علی عباسی اور عائزہ خان مرکزی کردار نبھائیں گے، دیگر کاسٹ میں سویرا ندیم، نوال سعید ودیگر شامل ہیں۔
جانِ جہاں کی ہدایت کاری کے فرائض قاسم علی مرید نے انجام دیے ہیں جبکہ اس کی کہانی ردا بلال نے لکھی ہے۔
ڈرامہ سیریل ’جانِ جہاں‘ کی پہلی قسط 22 دسمبر بروز جمعہ کو نشر کی جائے گی اور ناظرین ہر جمعے اور ہفتے کی رات 8 بجے ڈرامہ دیکھ سکیں گے۔
قابل ذکر بات یہ ہے کہ حمزہ علی عباسی اور عائزہ خان نے 2013 میں اے آر وائی ڈیجیٹل کے بلاک بسٹر ڈرامہ سیریل ’پیارے افضل‘ میں اداکاری کے جوہر دکھائے تھے۔
