سابق کپتان بابراعظم کے آؤٹ ہونے کے انداز پر سوالات اٹھنے لگے، کرکٹ ماہر سمجھتے ہیں کہ انھیں بولر آؤٹ نہیں کررہے وہ اپنی غلطی سے آؤٹ ہورہے ہیں۔
اے آر وائی کے پروگرام میں اظہار خیال کرتے ہوئے سینئر اسپورٹس رپورٹر شاہد ہاشمی کا کہنا تھا کہ پورے ورلڈکپ میں بابر اعظم خود سے آؤٹ ہوئے ہیں، بولر نے انھیں آؤٹ نہیں کیا۔ پرتھ ٹیسٹ میچ کی بھی دونوں اننگز میں بولر نے انھیں آؤٹ نہیں کیا۔
انھوں نے کہا کہ بابر جن بالز پر آؤٹ ہوئے وہ اتنی اچھی اور غیرمعمولی گیندیں نہیں تھیں کہ جسے بابر اعظم جیسا پلیئر نہیں کھیل پاتا۔
شاہد ہاشمی نے کہا کہ شان مسعود نے پریکٹس میچ میں 200 رنز اسکور کیے تھے اور ان سے اچھی بیٹنگ کی امید تھی، تاہم وہ 50 رنز بھی نہیں بناپائے۔
شان مسعود مسلسل ٹیسٹ میچ کھیل رہے ہیں، انگلینڈ، نیوزی لینڈ اور سری لنکا کے خلاف بھی وہ بڑی اننگز کھیلنے سے قاصر رہے تھے۔ شان مسعود کو اب بڑی اننگز کھیلنا ہوگی۔
سابق کپتان سرفراز احمد کے حوالے سے گفتگو کرتے ہوئے شاہد نے کہا کہ یہ ان کا آسٹریلیا کا تیسرا ٹور ہے لیکن ان کی کارکردگی بھی مایوس کن رہی۔ وہ 2010 میں بھی آسٹریلیا کا دورہ کرچکے ہیں۔
انھوں نے کہا ٹیم میں بہت زیادہ بیٹرز کو بھر لیا گیا ہے۔ ٹیسٹ میچز کے لیے چھ پکے بیٹرز ایک وکٹ کیپ اور چار یا پانچ بولرز کے ساتھ میدان میں اترنا چاہیے۔
فہیم اشرف کے حوالے سے انھوں نے کہا کہ وہ 2019 میں اچھی ٹیسٹ کرکٹ کھیل رہے تھے، ٹیسٹ میچز میں وہ وکٹیں بھی لیتے تھے اور رنز بھی اسکور کرتے تھے۔
تاہم انھیں ٹیم سے باہر نکال کر ان کی پرفارمنس خراب کردی گئی۔ وہ بھی ٹی ٹوئنٹی لیگز میں مشغول ہوگئے۔ اب ٹیسٹ کرکٹ میں ان کی اتنی دلچسپی نظر نہیں آتی۔
