پاکستان کے سابق ٹیسٹ کرکٹر باسط علی نے ویسٹ انڈیز کیخلاف ملتان ٹیسٹ میں بابر اعظم کی کارکردگی پر کڑی تنقید کی ہے۔
ملتان میں کھیلے گئے دوسرے ٹیسٹ میچ کی پہلی اننگز میں بابر اعظم پانچ گیندوں پر صرف ایک رن بناسکے اور دوسری اننگز میں بہتر آغاز کے باوجود وہ 67 گیندوں پر 31 رنز بنا کر آؤٹ ہوگئے۔
یوٹیوب چینل پر باسط لعی نے بابر کو کہا کہ وہ ویسٹ انڈیز کے اسپنر گڈاکیش موتی سے کچھ سیکھیں جنہوں نے دباؤ میں شاندار بیٹنگ کا مظاہرہ کیا۔
موتی نے نمبر 9 پر بیٹنگ کرتے ہوئے پہلی اننگز میں 87 گیندوں پر 55 رنز کی اہم شراکت قائم کی جس سے ان کی ٹیم کو ایک اہم برتری حاصل کرنے میں مدد ملی۔
انہوں نے کہا کہ بابر اعظم کو موتی سے بیٹنگ سیکھنے کی ضرورت ہے وہ جانتا ہے کہ کب آگے جانا ہے اور کب پیچھے کھیلنا ہے، یہاں تک کہ بڑے کھلاڑیوں کو بھی ہمیشہ سیکھنے کے عمل میں رہنا چاہیے، موتی اس ٹیسٹ میں بہترین بلے باز تھا۔
سابق کرکٹر نے ویسٹ انڈیز کی کمزور ٹیم سے ہارنے پر بھی کھلاڑیوں کو تنقید کا نشانہ بنایا۔
انہوں نے کہا کہ مہمان ٹیم سے اہم کھلاڑی غائب تھے اور نسبتاً نامعلوم نام شامل تھے جیسے میکائل لوئس، امیر جنگو، کیویم ہوج،جسٹس گریوز اور ڈیون املاچ وغیرہ۔
باسط علی نے کہا کہ نامعلوم کھلاڑی کی بی یا سی ٹیم نے پاکستان کو 120 رنز سے شکست دی، جیت اور ہار کھیل کا حصہ ہے لیکن یہ شرمناک تھا۔
واضح رہے کہ ویسٹ انڈیز نے پاکستان کو 254 رنز کے تعاقب میں صرف 133 رنز پر ڈھیر کرتے ہوئے 120 رنز سے شکست دے کر دو میچز کی سیریز 1-1 سے برابر کردی تھی۔
