بہاولنگر میں مسافر بس اور وین کے خوفناک تصادم کے نتیجے میں 4 افراد جاں بحق اور 20 افراد زخمی ہوگئے۔
تفصیلات کے مطابق حادثہ بہاولنگر میں ہارون آباد روڑ پر اڈا گجیانی کے قریب پیش آیا، تیز رفتار مسافر بس بے قابو ہوکر مخالف سمت سے آنے والی ہائی ایس وین سے ٹکرا گئی۔
ریسکیو ذرائع کے مطابق حادثہ تیز رفتاری اور دھند کے باعث پیش آیا، پولیس کا کہنا ہے مسافر بس بہاولنگر سے ہارون آباد جارہی تھی۔
ریسکیو ذرائع کا کہنا ہے کہ اس خوفناک تصادم کے نتیجے میں 4 افراد جاں بحق اور 20 افراد زخمی ہوگئے، زخمیوں کو ڈسٹرکٹ اسپتال منتقل کردیا گیا جس میں سے 8 کی حالت تشویشناک ہے۔
اس سے قبل کوٹ ادو میں سنانواں کے قریب مسافر وین کو خوفناک حادثہ پیش آیا تھا جس کے نتیجے میں 4 افراد جاں بحق جبکہ 12 زخمی ہوگئے تھے۔
ریسکیو حکام کا اس حوالے سے کہنا تھا کہ حادثے میں 12 سے زائد افراد شدید زخمی ہوئے جنہیں کوٹ ادو اور سنانواں اسپتال منتقل کر دیا گیا تھا لیکن زخمی افراد کی حالت انتہائی تشویشناک بتائی گئی۔
