راولپنڈی: بلوچستان میں سیکیورٹی فورسز کی دو مختلف کارروائیوں میں بھارتی پراکسی فتنہ الہندوستان کے 5 دہشت گرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق لورالائی میں سیکیورٹی فورسز نے فتنہ الہندوستان کے دہشت گردوں کے خلاف انٹیلیجنس بیسڈ آپریشن کیا اس دوران فائرنگ کے تبادلے میں 4 بھارتی اسپانسرڈ دہشت گرد ہلاک ہوگئے۔
ترجمان پاک فوج کا کہنا ہے کہ دہشت گردوں سے ہتھیار، گولہ بارود اور دھماکا خیز مواد برآمد ہوا ہے، ہلاک دہشت گرد 26 اگست 2024 اور 18 فروری 2025 کو نیشنل ہائی وے پر دہشت گردی میں ملوث تھے۔
آئی ایس پی آر کا کہنا ہے کہ ہلاک دہشت گردوں نے نیشنل ہائی وے پر 30 بے گناہ شہریوں کو شہید کردیا تھا۔
ترجمان پاک فوج کے مطابق ہلاک بھارتی اسپانسر دہشت گرد قانون نافذ کرنے والے اداروں کو مطلوب تھے۔
سیکیورٹی فورسز نے ضلع کیچ میں ایک اور کارروائی میں ایک دہشت گرد ہلاک کردیا۔
آئی ایس پی آر کا کہنا ہے کہ سیکیورٹی فورسز ملک سے بھارتی انسپانسرڈ دہششتگردی کے خاتمے کے لیے پرعزم ہیں، دہشت گردی کے مرتکب افراد اور سہولت کاروں کو انصاف کے کٹہرے میں لایا جائے گا۔
