کوئٹہ: بلوچستان کے ایک ضلع میں ’بیرونی حمایت یافتہ‘ دہشت گردوں کے خلاف کارروائی کے دوران سیکیورٹی فورسز کے تین جوانوں نے جامِ شہادت نوش کرلیا۔
پاک فوج کے شعبۂ تعلقاتِ عامہ (آئی ایس پی آر) کی جانب سے جاری اعلامیے کے مطابق سیکیورٹی فورسز نے بلوچستان کے علاقے ہوشاب میں بیرونی حمایت یافتہ دہشت گردوں کی موجودگی کی اطلاع پر کارروائی کی۔سیکیورٹی فورسز کے آپریشن کے دوران دہشت گردوں کو بھاری نقصان کا سامنا بھی کرنا پڑا۔
آئی ایس پی آر کے مطابق ’کلیئرنس آپریشن‘ کے دوران دیسی ساختہ بارودی سرنگ کا دھماکا ہوا، جس کے نتیجے میں سپاہی انعام اللہ شہید جبکہ فائرنگ کے تبادلےمیں سپاہی رمضان اور لانس نائیک لیاقت اقبال نے جام شہادت نوش کیا۔
پاک فوج کے ترجمان نے واضح کیا کہ فورسز ملک دشمن عناصرکو شکست دینےکیلئے پر عزم ہیں، بلوچستان میں امن واستحکام اور ترقی کا عمل کسی کو متاثر کرنے کی اجازت نہیں دیں گے۔
واضح رہے کہ بلوچستان میں متحرک ہونے کی کوشش کرنے والے شدت پسندوں اور علیحدگی پسند گروپوں کے خلاف پاک فوج کی جانب سے اکثر کارروائیاں کی جاتی ہیں، جس میں دہشت گردوں کو بھاری نقصان کا سامنا کرنا پڑتا ہے جبکہ پاک فوج کےجوان بھی جام شہادت نوش کرتے ہیں۔
