گلگت: قراقرم انٹرنیشنل یونیورسٹی کے شعبہ ابلاغ عامہ کے طلبہ نے ’بامِ دنیا فلم فیسٹیول 2024‘ میں فلموں کی مختلف کیکٹگریز میں اعزاز اپنے نام کر لیا۔
سرینہ گلگت میں پہاڑوں کے عالمی دن کے حوالے سے اپنی نوعیت کا منفرد ایک روزہ فلم فیسٹیول بعنوان ’بام دنیا فلم فیسٹیول 2024‘ منعقد کیا گیا، یہ خطہ ہندو کش، ہمالیہ اور قراقرم کا سب سے بڑا میلہ ہے۔
اس فلم فیسٹیول کا مقصد طویل اور مختصر دورانیے کی فلموں اور فلم میکرز کی حوصلہ افزائی اور قدرتی وسائل کو درپیش خطرات سے متعلق شعور و آگاہی بیدار کرنا ہے۔
بام دنیا فلم فیسٹیول 2024 میں شعبہ ابلاغ عامہ جامعہ قراقرم کے طلبہ کی فلم نے بہترین فلم کا ایوارڈ جیتا، فیسٹیول میں نوجوان فلم سازوں کی تیار کردہ شارٹ فلموں کی نمائش کی گئی، شعبہ ابلاغ عامہ قراقرم انٹرنیشنل یونیورسٹی کے طلبہ سپنہ ضمیر، حفضہ، حکمہ اور رینگچن محمد امر شگری کی فلم نے بہترین فلم کا ایوارڈ اپنے نام کیا۔
ایک روزہ بام دنیا فلم فیسٹیول میں طویل اور محتصر دورانیے کی 16 فلمیں آخری مقابلے کے لیے منتخب کی گئی تھیں، جن میں سے تین دستاویزی فلموں کو ایوارڈ سے نوازا جا رہا ہے۔
فیسٹیول میں شامل فلم سازوں میں سے زیادہ تر یونیورسٹی کے طلبہ تھے جن کے پاس وسائل اور نیٹ ورک کی کمی ہے، منتظمین کے مطابق بام دنیا فلم فیسٹیول گلگت بلتستان کا سب سے بڑا فیسٹیول ہے، جو پہاڑوں والے علاقائی ممالک کے ساتھ مضبوط روابط کے ساتھ ہر سال منعقد کیا جاتا ہے۔
فیسٹیول میں مجموعی طور پر 18 شارٹ فلمیں نمائش کے لیے پیش کی گئیں، بدھ کو فیسٹیول کے آخری دن جیوری کے ممبران نے 9 کیٹگریز میں فاتحین کو ایوارڈز اور سرٹیفکیٹس تقسیم کیے۔
