ڈھاکا: بنگلادیش میں عام انتخابات کے لیے پولنگ کا عمل شروع ہو چکا ہے، اپوزیشن جماعتوں نے انتخابات کا بائیکاٹ کیا ہے۔
غیر ملکی میڈیا رپورٹس کے مطابق بنگلادیش میں عام انتخابات کے لیے پولنگ جاری ہے، ملک بھر میں ووٹنگ کا آغاز مقامی وقت کے مطابق صبح 8 بجے شروع ہوا جو شام 4 بجے تک جاری رہے گا۔
اپوزیشن کے بائیکاٹ کے سبب وزیر اعظم حسینہ واجد کی جیت کا امکان ہے، دوسری جانب اپوزیشن جماعتوں نے 2 روزہ ملک گیر ہڑتال کی کال دی ہے اور عوام سے ووٹ نہ ڈالنے کی اپیل کی گئی ہے۔
انتخابات سے ایک روز قبل کئی پولنگ بوتھ جلا دیے گئے، ٹرین کو آگ لگا دی گئی جس سے دو بچوں سمیت 4 افراد ہلاک ہوئے، آگ لگانے کے واقعات فوج کی تعنیاتی کے بعد پیش آئے، پولیس نے اپوزیشن کو واقعے کا ذمے دار قرار دے کر 7 ارکان کو گرفتارکر لیا ہے، تاہم اپوزیشن نے الزامات مسترد کر دیے ہیں، وزیر اعظم شیخ حسینہ نے بنگلادیش نیشنل پارٹی کو دہشت گرد تنظیم قرار دیا ہے۔
ڈھاکا میں مسافر ٹرین کو آگ لگادی گئی، متعدد ہلاک
امریکی اخبارات نے انتخابات کو مغربی ممالک کے ساتھ تعلقات کا امتحان قرار دے دیا ہے، بی این پی کے بائیکاٹ کے بعد شیخ حسینہ واجد کی عوامی مسلم لیگ کی کامیابی یقینی دکھائی دے رہی ہے، بی این پی نے وزیر اعظم سے استعفے کا بھی مطالبہ کیا ہے۔
یاد رہے کہ بی این پی نے 2014 کے انتخابات کا بھی بائیکاٹ کیا تھا، اور 2018 کے انتخابات میں دھاندلی کے الزامات لگائے تھے، بی این پی کی جانب سے آج اور کل ملک گیر ہڑتال کا اعلان کیا گیا ہے، ہڑتال کے دوران بنگلادیش میں مظاہرے شروع ہو گئے ہیں، جب کہ مشتعل مظاہرین کے خلاف پولیس کریک ڈاؤن کر رہی ہے۔
کئی مقامات پر پولنگ اسٹیشنز جلائے گئے ہیں، دارالحکومت ڈھاکا میں 14 پولنگ اسٹیشنوں کو آگ لگائی گئی، گزشتہ روز مظاہروں میں مسافر ٹرین کو بھی جلا دیا گیا تھا، اقوام متحدہ کے نمائندہ خصوصی نے ایک بیان میں تبصرہ کیا کہ بنگلادیش میں انتخابات میں جابرانہ ماحول پریشان کن ہے۔
