کراچی: اسٹیٹ بینک آف پاکستان کی جانب سے بینک اکاؤنٹس کی بائیو میٹرک تصدیق کے آخری دن تمام بینکس چھٹی کے روز بھی معمول کے مطابق امور سرانجام دے رہے ہیں۔
تفصیلات کے مطابق اسٹیٹ بینک آف پاکستان کی جانب سے بینک اکاؤنٹ رکھنے والے صارفین کو بائیو میٹرک تصدیق کرنے کے لیے ایک ماہ قبل پیغامات ارسال کیے گئے اور تمام بینکوں کو بھی ہدایت کی گئی کہ وہ صارفین کو بلا کر فنگر پرنٹس سے شناختی تصدیق کریں۔
بینک اکاؤنٹس کی بائیو میٹرک کی تصدیق کا آج آخری دن ہے، صارفین کو سہولت فراہم کرنے کے لیے اسٹیٹ بینک کی ہدایت پر تمام بینکس اتوار کے روز بھی پانچ بجے تک کام میں مصروف ہیں۔
مزید پڑھیں: گھر بیٹھے بینک اکاؤنٹ کی بائیو میٹرک تصدیق، بینکوں نے موبائل ایپلی کیشن متعارف کرادی
اکاؤنٹ کی بائیو میٹرک تصدیق نہ کرانے والا صارف بینک سے کوئی ٹرانزیکشن نہیں کرسکے گا، صارفین کے پاس آج پانچ بجے تک کا وقت ہے۔ ذرائع کے مطابق بائیومیٹرک نظام پر منتقل ہونے کی شرح 70سے80فیصد ہے، نیشنل بینک میں 30 لاکھ سے زائد اکاؤنٹس بائیومیٹرک پر آگئے۔
اسٹیٹ بینک آف پاکستان کے مطابق بائیومیٹرک نظام پرمنتقلی کی حتمی تعداد 30 جون کے بعد پتہ چلے گی۔ یاد رہے کہ بائیو میٹرک تصدیق کا اہم مقصد غیر قانونی اور بے نامی ٹرانزیکشنز کے ساتھ منی لانڈرنگ کی کی روک تھام ہے۔
صارفین کے لیے گھر بیٹھے بائیومیٹرک
بینک اکاوٴنٹس کی گھر بیٹھے بائیو میٹرک تصدیق کرانے کے لیے بیشتر بینکوں نے خصوصی موبائل ایپلی کیشن متعارف کرائی ہیں۔
