راولپنڈی: پی ٹی آئی کے رہنما بیرسٹر گوہر کا کہنا ہے کہ ہمارے ارکان کو 10 سے 25 کروڑ کی پیشکش کی جارہی ہے، یہ غیر قانونی اور غیر آئینی ہی نہیں غیر اخلاقی بھی ہے۔
اے آر وائی نیوز کے مطابق اڈیالہ جیل کے باہر میڈیا سے گفتگو کرتے ہوئے بیرسٹر گوہر علی خان نے کہا کہ وزیر اعظم اور وزیر اعلیٰ پنجاب کے ناموں کا اعلان جمعرات تک کریں گے۔
انہوں نے کہا کہ مسلم لیگ ن، پیپلزپارٹی اور ایم کیو ایم سے کسی قسم کا اتحاد نہیں کریں گے، بانی پی ٹی آئی نے اپنی حکومت بنانے کا فیصلہ کیا ہے۔
بیرسٹر علی ظفر نے کہا کہ اصل گتنی ہو تو کل ہی حکومت بناسکتے ہیں۔
واضح رہے کہ اس سے قبل ترجمان پی ٹی آئی رؤف حسن نے پریس کانفرنس کرتے ہوئےکہا تھا کہ بانی پی ٹی آئی کا پیغام ہے کہ جو انتخابات جیتا ہے اسے حکومت بنانے دی جائے، کے پی کے میں علی امین گنڈاپور حکومت بنائیں گے۔
رؤف حسن کا کہنا تھا کہ بانی پی ٹی آئی نے کہا کہ انٹرا پارٹی انتخابات جتنی جلدی ہو کروا دیے جائیں ،کے پی میں ہم حکومت کی تشکیل کی طرف جا رہے ہیں، وفاق اور پنچاب میں ایم ڈبلیو ایم کے ساتھ اتحاد کریں گے۔
ان کا کہنا تھا کہ جماعت اسلامی کے ساتھ خیبرپختونخوا میں حکومت بنائی جائے گی۔
