باسط علی نے آئی سی سی ایونٹ کے حتمی مقابلے کے حوالے سے پیشگوئی کی ہے کہ لگتا ہے چیمپئنز ٹرافی کا فائنل دبئی میں ہی ہوگا۔
اے آر وائی نیوز کے پروگرام ہرلمحہ پُرجوش میں گفتگو کرتے ہوئے قومی کرکٹ ٹیم کے سابق بلے باز باسط علی نے کہا کہ آن پیپر بھارت آسٹریلیا کے مقابلے میں بہت مضبوط ٹیم ہے، آسٹریلیا اگر بھارت کو ہرائے گا تو یہ اپ سیٹ ہوگا۔
انھوں نے کہا کہ بارش کی وجہ سے آسٹریلیا سیمی فائنل میں آیا ہے، آسٹریلیا کی جگہ افغانستان کو سیمی فائنل میں ہونا چاہیے تھا۔
ہائبرڈ ماڈل پر سارے بورڈز راضی تھے، اب شور مچانے کا کیا فائدہ؟ باسط علی
سابق ٹیسٹ کرکٹر باسط علی کا کہنا تھا کہ چیمپئنز ٹرافی 2025 میں سب سے زیادہ رنز پاکستان کی پچز پر بنے، لاہور اور پنڈی کی پچز بلے بازوں کیلئے جنت جیسی ہیں۔
اسی پروگرام میں سابق کرکٹر کامران اکمل نے اظہار خیال کرتے ہوئے کہا کہ دبئی میں میچز پاکستان کے مقابلے میں تھوڑے سلو ہوئے۔
کامران اکمل کا کہنا تھا کہ پی سی بی نے اب فیصلہ کرنا ہے آگے کن لڑکوں کو موقع دینا ہے، ساری چیزیں سامنے آگئی ہیں ابھی بھی نہ سمجھ آئے تو اللہ ہی حافظ ہے۔
