کراچی : ایڈیشنل آئی جی عمران یعقوب نے کہا ہے کہ شہر قائد کراچی میں 3سے 4 لاکھ بھکاری ہر سال سیزن لگانے آتے ہیں۔
انہوں نے کہا کہ جرائم پیشہ عناصر بھی عید کے سیزن میں وارداتوں کیلئے دوسرے شہروں سے یہاں آتے ہیں، وارداتیں اور بھیک مانگنے والوں کا زیادہ تر کا تعلق کراچی کے باہر سے ہوتا ہے۔
میڈیا سے گفتگو کرتے ہوئے ایڈیشنل آئی جی کراچی نے کہا کہ شہر قائد میں کوئی شخص بلوچستان تو کوئی اندرون سندھ یا دیگر علاقوں سے یہاں پہنچتا ہے۔
عمران یعقوب کا کہنا ہے کہ کراچی میں اسٹریٹ کرائم پر قابو پانے کیلئے کیمرہ کوریج ضروری ہے، زیادہ سے زیادہ کیمرے لگیں تاکہ بھکاریوں کی شناخت ہو سکے۔
انہوں نے بتایا کہ اب کراچی میں آبادی بہت زیادہ بڑھ چکی ہے، دستاویزی آبادیاں اب بہت کم ہیں، اس لیے تھانے کا انٹیلی جنس اسٹاف اب تمام لوگوں پر نظر نہیں رکھ سکتا۔
ایڈیشنل آئی جی کراچی نے مزید کہا کہ کراچی ڈھائی سے 3کروڑ کی آبادی والا شہر ہے، چاند رات اور عید کے لیے خصوصی سیکیورٹی پلان مرتب کیا ہے۔
