بھارت کی مشرقی ریاست بنگال کی وزیراعلیٰ ممتا بینرجی حملے میں زخمی ہوگئیں۔
بھارتی میڈیا رپورٹ کے مطابق ریاست بنگال کی وزیراعلیٰ ممتا بینرجی پر نندی گرم کے علاقے میں اُس وقت حملہ ہوا جب وہ آنے والے الیکشن کے لیے بطور امیدوار اپنے کاغذات جمع کرانے الیکشن آفس پہنچی۔
عینی شاہدین کے مطابق ممتا بینرجی پر گاڑی میں داخل ہوتے وقت حملہ کیا گیا جس کے بعد انہیں زخمی حالت میں اسپتال منتقل کیا گیا۔
عینی شاہدین کا کہنا ہے کہ محافظوں نے بے ہوشی کی حالت میں 66 سالہ وزیراعلیٰ کو گاڑی میں ڈالا اور پھر انہیں اسپتال لے کر روانہ ہوئے۔
ذرائع کے مطابق حملے کے نتیجے میں ممتا بینرجی کو اندرونی چوٹیں آئیں جبکہ اُن کا پیر بھی ٹوٹ گیا ہے۔
ممتا بینرجی نے اسپتال سے جاری اپنے پیغام میں بتایا کہ اُن پر قاتلانہ حملہ کیا گیا، چار سے پانچ حملہ آوروں نے انہیں مارنے کی کوشش کی، البتہ محافظوں کی وجہ سے وہ اپنے مقصد میں کامیاب نہیں ہوسکے۔
میڈیا رپورٹ کے مطابق بنگال کی وزیر اعلیٰ رات نندی گرم میں گزاریں گی اور کل صبح علاج کے لیے کلکتہ روانہ ہوں گی۔
