بھارت کے شہر بھوپال میں 8 سالہ بیٹے کو لفٹ میں پھنسا دیکھ کر باپ دل کا دورہ پڑنے سے جان کی بازی ہار گیا۔
بھارتی میڈیا رپورٹس کے مطابق بھوپال کے علاقے مسرود میں ایک رہائشی عمارت کی لفٹ میں بجلی چلی گئی، جس کے باعث 8 سالہ بچہ پھنس گیا، بچے کا والد رشیراج اپنے کم عمر بیٹے کو لفٹ میں پھنسا دیکھ کر شدید پریشان ہوگیا۔
رپورٹس کے مطابق باپ فوراً دوڑتا ہوا سکیورٹی گارڈ کے پاس جنریٹر آن کرانے کیلئے پہنچا جہاں وہ دل کا دورہ پڑنے سے زمین پر گر پڑا اور بے ہوش ہوگیا۔
پڑوسیوں نے سی پی آر کے ذریعے اس شخص کی زندگی بچانے کی کوشش کی لیکن کوئی ردعمل نہ ملنے پر اسے اسپتال منتقل کیا گیا جہاں ڈاکٹروں نے موت کی تصدیق کردی۔
پولیس کا کہنا ہے کہ واقعے کی تحقیقات کررہے ہیں تاہم لفٹ میں پھنسے بچے کو کوئی نقصان نہیں پہنچا۔
اس سے قبل ایک اور واقعے میں بھارت کی ریاست راجستھان میں ’جونیئر نیشنل گیمز‘ کی گولڈ میڈلسٹ پاور لفٹر پریکٹس کے دوران گردن پر 270 کلو وزن گرنے سے ہلاک ہوگئی تھی۔
انڈین میڈیا کی رپورٹس کے مطابق 17 سالہ خاتون پاور لفٹر یشتیکا اچاریہ کی جم میں موت کی ویڈیو سوشل میڈیا کے مختلف پلیٹ فارمز پر گردش کر رہی ہے۔
پولیس حکام نے بتایا کہ گولڈ میڈلسٹ یشتیکا اچاریہ کی گردن اس وقت ٹوٹ گئی جب 270 کلو وزن ہاتھوں سے چھوٹ کر ان کی گردن پر آ گرا، حادثے کے فوراً بعد انہیں اسپتال لے جایا گیا جہاں ڈاکٹروں نے موت کی تصدیق کی۔
پولیس حکام کے مطابق افسوسناک حادثے میں متوفی کے ٹرینر کو بھی معمولی چوٹیں آئیں، اہل خانہ نے اندراج مقدمہ کیلیے درخواست نہیں دی، لاش پوسٹ مارٹم کے بعد لواحقین کے حوالے کر دی گئی۔
اسپتال کی لفٹ گرنے سے خاتون جاں بحق
یشتیکا اچاریہ نے اپنے مختصر کیریئر میں کئی کامیابیاں حاصل کی تھیں، ان کی موت سے کھیلوں کے حلقے میں سوگ کی لہر دوڑ گئی۔
