امریکی صدر جوبائیڈن اور اسرائیلی وزیراعظم نیتن یاہو کے درمیان ٹیلیفونک ہوا ہے، جس میں اسرائیل پر ایران کے حملے کے بعد کی صورتحال پر بات چیت ہوئی۔
بین الاقوامی خبر رساں ادارے کی رپورٹ کے مطابق امریکی صدر جوبائیڈن اور نیتن نے آدھے گھنٹے تک ٹیلیفون پر بات کی اور ایران کے خلاف بھرپور جوابی کارروائی کا عہد کیا۔
دونوں رہنماؤں نے حماس سے جنگ بندی پر کوئی بات نہیں کی، حزب اللّٰہ کے خلاف کارروائیاں جاری رکھنے پر بھی غور کیا گیا۔
وائٹ ہاؤس کی پریس سکریٹری نے کہا کہ اختلافات کے باوجود جوبائیڈن اور نیتن یاہو کے درمیان بات چیت نتیجہ خیز ثابت ہوئی۔
دوسری جانب اسرائیل کے وزیرِ اعظم بن یامین نیتن یاہو نے لبنان کو خبردار کیا ہے کہ اگر حالات مزید بگڑے تو اسے بھی غزہ کی طرح تباہی کا سامنا کرنا پڑ سکتا ہے۔
رپورٹ کے مطابق اپنے ایک حالیہ جاری بیان میں نیتن یاہو نے لبنان کے لوگوں سے مخاطب ہو کر کہا کہ آپ کے پاس موقع ہے کہ لبنان کو ایک طویل جنگ کے دلدل میں جانے سے بچالیں جو ویسے ہی تباہی اور تکلیف لائے گی جیسی ہم غزہ میں دیکھ رہے ہیں۔
نیتن یاہو کا کہنا تھا کہ میں لبنان کے عوام سے کہنا چاہتا ہوں کہ اپنے ملک کو حزب اللہ سے آزاد کرائیں تاکہ یہ جنگ ختم ہو سکے۔
رپورٹ کے مطابق اسرائیل نے حزب اللہ کے خلاف اپنی زمینی کارروائیوں کا دائرہ جنوبی لبنان کے ساحلی علاقوں تک پھیلا دیا ہے۔ اسرائیلی فوج نے گزشتہ رات جنوبی بیروت میں حملہ کرکے 4رہائشی عمارتوں کو تباہ کردیا۔
ٹرمپ، پیوٹن رابطوں کا انکشاف، نیا پینڈورا باکس کھل گیا
اسرائیل نے لبنان میں حزب اللہ کے ٹھکانوں کو بھی نشانہ بنایا ہے، اور جنوبی بیروت میں بھی حملے کیے ہیں، جن میں اب تک مجموعی طور 1ہزار150 سے زائد لبنانی شہید اور لاکھوں لوگ بے گھر ہوگئے ہیں۔
