کراچی: اعلیٰ ثانوی تعلیمی بورڈ کراچی نے انٹرمیڈیٹ سائنس پری میڈیکل اور سائنس جنرل گروپس کے ضمنی امتحانات برائے سال 2018ء کے نتائج کا اعلان کردیا۔
اعلیٰ ثانوی تعلیمی بورڈ کراچی کے چیئرمین پروفیسر انعام احمد نے نتائج کا اعلان کرتے ہوئے بتایا کہ سائنس پری میڈیکل گروپ کے امتحانات میں 6338 امیدواروں نے رجسٹریشن کرائی جبکہ 6121 امیدوار امتحانات میں شریک ہوئے جن میں سے 1951کامیاب قرار پائے جس کا تناسب 31.87 فیصد رہا۔
اُن کا کہنا تھا کہ سائنس جنرل کے امتحانات میں 1978امیدواروں نے رجسٹریشن حاصل کی جبکہ امتحانات میں 1930امیدوار شریک ہوئے جن میں سے 523 امیدوار کامیاب ہوئے اس طرح کامیابی کا تناسب 27.10فیصد رہا۔
چیئرمین بورڈ کا کہنا تھا کہ پری میڈیکل اور سائنس کے امتحانات میں 2 امیدواروں نے اے ون گریڈ، 6 نے اے گریڈ، 48 نے بی گریڈ، 712 نے سی گریڈ، 1111 ڈی اسی طرح 69 ای گریڈ سے کامیابی حاصل کی جبکہ 3 امیدوار صرف پرچے کلیئر کر سکے۔
جنرل سائنس کے امتحانات میں کوئی بھی امیدوار اے ون اور اے گریڈ حاصل نہیں کرسکا جبکہ 42امیدوار بی، 252 سی گریڈ، 222 ڈی گریڈ اور 6 امیدوار ای گریڈ میں کامیاب ہوئے جبکہ ایک امیدوار پاس قرار پایا۔
ثانوی بورڈ کے ترجمان کا کہنا تھا کہ طلباء ایس ایم ایس کے ذریعہ بھی اپنے نتائج معلوم کرسکتے ہیں، جس کے انہیں مسیج میں جاکر BIEK اسپیس اور اپنا رول نمبر ٹائپ کر کے 8583 پر بھیجنا ہوگا۔ علاوہ ازیں بورڈ کی ویب سائٹ پر رزلٹ دیکھا جاسکتا ہے۔
