ممبئی: بدنام زمانہ کینگسٹر لارینس بشنوئی نے تہلکہ خیز انکشاف کیا ہے کہ سلمان خان کے علاوہ بھی کئی لوگ میری ہٹ لسٹ پر ہیں۔
بھارتی میڈیا رپورٹ کے مطابق یہ انکشافات گینگسٹر لارینس بشنوئی نے گذشتہ سال پولیس حراست میں کئے تھے، بشنوئی نے بتایا تھا کہ ان کے نشانے پر اداکار سلمان خان سمیت دس لوگ ہیں۔
لارینس بشنوئی نے تہلکہ خیز انکشاف کیا تھا کہ کالج لائف سے لے کر گینگسٹر بننے تک کے سفر میں کتنے جرائم کیے اور کس کس کو قتل کیا؟۔
لارینس بشنوئی نے بتایا کہ بالی وڈ اداکار سلمان خان ان کی فہرست میں پہلے نمبر پر ہیں، لارینس نے بتایا کہ انیس سو اٹھانوے میں سلمان خان نے جودھ پور میں ایک فلم کی شوٹنگ کے دوران کالے ہرن کا شکار کیا تھا۔
واضح رہے کہ سماج (بشنوئی سماج) میں لارینس آتا ہے وہاں کالے ہرن کی پوجا کی جاتی ہے، یہی وجہ ہے کہ لارینس بشنوئی سلمان خان کو مارنا چاہتے ہیں۔
یہ بھی پڑھیں: سلمان خان کو قتل کرنے کا مبینہ پلان بی سامنے آگیا
سلمان خان کے قتل کے لئے لارینس نے اپنے قریبی سمپت نہرا کو ریکی کے لیے ممبئی بھیجا تھا، سمپت کو بعد میں ہریانہ پولیس نے گرفتار کرلیا تھا۔
پولیس حراست میں لارینس نے بتایا تھا کہ اس کا دوسرا نشانہ شگن پریت ہے، شگن پریت پنجاب کے مشہور گلوکار سدھو موسے والا کا منیجر ہے اور موسی والا کا اکاؤنٹ سنبھالتا ہے۔ لارینس کے مطابق شگن پریت نے وکی مڈوکھیڑا کے قاتلوں کو چھپانے میں مدد کی تھی جو لارینس کے بہت قریب تھے۔
لارینس نے اپنے انکشافات میں کہا گینگسٹر کوشل چوہدری اس کا دشمن گینگ ہے اور کوشل نے نہ صرف وکی مدوکھیڑا کے قاتلوں بھولو شوٹر، انل لٹھ اور سنی لیفٹی کو اسلحہ فراہم کرائے تھے، وکی مدوکھیڑا کے قتل کی پوری سازش امیت ڈاگر اور کوشل چوہدری نے تیار کی تھی۔
لارینس نے سنسنی خیز انکشاف کیا کہ بمبیہا میرا جانا پہچانا دشمن گینگ ہے، دیویندر بمبیہا کی موت کے بعد اس کا گینگ سکھ پریت سنگھ آپریٹ کر رہا ہے، میرے قریبی دوست امیت شرن کے قتل کے پیچھے سکھ پریت سنگھ کا ہاتھ ہے۔ اس لیے مجھے اس سے بدلہ لینا ہے۔
لارینس کے مطابق لکی پٹیال میرا دشمن گینگ ہے، لکی کے کہنے پر میرے قریبی دوست گرلال برار کو قتل کیا گیا، اس نے وکی مدھو کھیڑا کے شوٹروں اور چھپنے والوں کی مدد کی۔
بدنام زمانہ گینگسٹر کا کہنا تھا کہ مجھے اپنے کزن امندیپ کے قتل کا بدلہ رمی مسانا سے لینا ہے، وہ میرے دشمن گؤنڈر گینگ کا شارپ شوٹر ہے۔
لارینس بشنوئی نے بتایا کہ بھولو شوٹر، انل لٹھ اور سنی لیفٹی میرے دشمن گینگ کوشل چودھری کے شوٹر ہیں۔ کوشل کے کہنے پر ہی ان تینوں نے وکی مدوکھیڑا کا قتل کیا تھا۔
