کراچی: پاکستان پیپلز پارٹی کے چیئرمین بلاول بھٹو زرداری نے مولانا فضل الرحمان کی دعوت قبول کر لی ہے۔
تفصیلات کے مطابق پی پی چیئرمین نے سب سے پہلے جے یو آئی ف کے سربراہ کی اے پی سی کے لیے دعوت قبول کر لی، مولانا نے ان سے رابطہ کر کے آل پارٹیز کانفرنس میں مدعو کیا تھا۔
ترجمان بلاول بھٹو کا کہنا تھا کہ پی پی چیئرمین نے آل پارٹیز کانفرنس میں شریک ہونے کا فیصلہ کیا ہے، اے پی سی میں پیپلز پارٹی کے سینئر رہنما بھی شریک ہوں گے۔
تازہ ترین: ایک اور اے پی سی، مولانا نے ’دعوت نامے‘ بانٹ دیے
یاد رہے کہ جمعیت علمائے اسلام ف کے سربراہ مولانا فضل الرحمان کے حکومت گرانے کے سارے پلان فیل ہونے کے بعد انھوں نے ایک بار پھر اے پی سی بلا لی ہے، اس سلسلے میں انھوں نے گزشتہ رات تمام اپوزیشن جماعتوں کے قائدین سے رابطے مکمل کر لیے تھے۔
مولانا نے پیپلز پارٹی، ن لیگ، اے این پی، قومی وطن پارٹی کے قائدین سمیت نیشنل پارٹی، جے یو پی، جمعیت اہل حدیث کے قائدین کو بھی شرکت کی دعوت دی ہے۔ اپوزیشن کی آل پارٹیز کانفرنس میں پختونخوا ملی عوامی پارٹی کی قیادت بھی مدعو ہے۔
میاں شہباز شریف بیرون ملک ہونے کی وجہ سے اے پی سی میں شرکت کے لیے ن لیگ کا اعلیٰ سطح کا وفد تشکیل دے دیا گیا ہے جس میں راجہ ظفرالحق، احسن اقبال، ایاز صادق اور امیر مقام شامل ہیں۔
