لاہور: پاکستان پیپلز پارٹی کے چیئرمین بلاول بھٹو زرداری نے کہا ہے کہ ملک کے پانی پر سودے بازی ہوتی رہی ہے، پی پی نے سب سے زیادہ چھوٹے ڈیم بنائے، خیبر پختون خوا حکومت سنجیدہ ہے تو اتنے ڈیم بنائے جتنے سندھ نے بنائے۔
ان خیالات کا اظہار انھوں نے لاہور پریس کلب میں نیوز کانفرنس میں کیا، بلاول بھٹو کا کہنا تھا کہ کون سا ملک اپنے دشمن ملک کو 3 دریا بیچتا ہے، یہ لوگ ڈیم بنانے کے معاملے پر سنجیدہ نہیں، پنجاب اور کے پی حکومتیں ہم سے ڈیم بنانے پر بات کر لیں۔
انھوں نے کہا ہم چاہتے اس ملک میں صنعت لگے، کاروبار ہو، معیشت اس انداز سے چلے کہ ہر آدمی کا خیال رکھا جائے، نچلی سطح پر خرچ کرنے کا فائدہ معیشت کو ہوتا ہے، ہمارے ٹیکس نظام میں خامیاں ہیں، ہم عوام کے معاشی حقوق میں سودے بازی کو تیار نہیں، حکومت آئی ایم ایف سے بات نہیں کر سکتی تو گھر چلی جائے، ہم کر لیں گے مذاکرات، حکومت کی طرف سے آئی ایم ایف کے ساتھ غلط بات چیت کی گئی ہے۔
نیب نے آصف زرداری کے قریبی ساتھی کی بے نامی جائیداد کا پتہ لگا لیا
چیئرمین پیپلز پارٹی نے حکومت اور نیب پر تنقید کے تیر چلا دیے، کہا ملک میں سیاسی انتقام عروج پر ہے، کوئی یہ ماننے کے لیے تیار نہیں کہ نواز شریف جیل میں کرپشن کی وجہ سے گئے، آج خورشید شاہ کے مرحوم بھائی کو نیب نے نوٹس بھیج دیا، سیاسی لوگ نشانے پر ہیں، ہم سمجھتے ہیں نیب کالا قانون ہے اسے بند کر دیں۔
بلاول بھٹو نے افغان مذاکرات کے حوالے سے کہا کہ بین الافغان مذاکرات سے امید کی جا سکتی ہے کہ وہاں امن ہو جائے گا، معاہدے سے افغان عوام کو حقوق مل جائیں تو بہت بہتر ہوگا، ہمارے اور نواز شریف کے دور میں تو حقانی برے تھے، ڈو مور کہا جاتا تھا، اب سراج حقانی نیویارک ٹائمز میں ایڈیٹوریل پیج میں کالم لکھتا ہے۔
وزارت ریلوے سے متعلق انھوں نے تنقید کرتے ہوئے کہا حیران کن بات ہے کہ شیخ رشید اب تک وفاقی وزیر ہیں، اتنے ٹرین حادثات ماضی میں نہیں ہوئے جتنے شیخ رشید دور میں ہوئے، وہ سلیکٹڈ وزیر ہیں۔
