اسلام آباد: چیئرمین پاکستان پیپلز پارٹی بلاول بھٹو زرداری کا کہنا ہے کہ 25 اکتوبر کے بعد آئینی ترامیم میں مشکلات ہوں گی اور مخصوص نشستوں کا فیصلہ یہی اشارہ کرتا ہے۔
بلاول بھٹو زرداری نے سپریم کورٹ پریس ایسوسی ایشن کے وفد سے ملاقات کی اور آئینی عدالت اور عدالتی اصلاحات سے متعلق تبادلہ خیال کیا۔
اس موقع پر بلاول بھٹو زرداری کا کہنا تھا کہ 25 سے پہلے ترامیم ہوئیں تو 19ویں ترمیم جیسی مشکلات نہیں ہوں گی۔ انہوں نے کہا کہ ترامیم کو میں لیڈ کرتا تو پی ٹی آئی کو بھی ساتھ رکھتا، مولانا فضل الرحمان کی خواہش ہے پی ٹی آئی کو بھی ساتھ لیا جائے۔
انہوں نے کہا کہ حکومت نے ہم سے پہلے ترامیم کا آئیڈیا عدلیہ سے شیئر کیا اور اس کے بعد مخصوص نشستیں ہی ہم سے چھن لی گئیں، شاید اسی لیے اس بار ترامیم کو خفیہ رکھا گیا ہے۔
صحافی نے سوال کیا کہ کیا بانی پی ٹی آئی کا ملٹری ٹرائل ہونا چاہیے؟ اس پر بلاول بھٹو نے جواب دیا کہ بانی پی ٹی آئی کا ملٹری ٹرائل کرنا ہے تو ثبوت لائیں، فکر نہ کریں معافی کا اختیار اس وقت ہمارے پاس ہے۔
سابق وزیر خارجہ نے کہا کہ آئینی عدالت کا قیام میثاق جمہوریت کا حصہ ہے، ہم صوبائی سطح پر بھی آئینی عدالتیں چاہتے ہیں، کراچی بدامنی کیس کو برسوں سے زیر التوا رکھا گیا ہے جسے بنیاد بنا کر عدالت نے سندھ کا بلدیاتی نظام تک بدلا، بدامنی کیا صرف کراچی میں ہے خیبر پختونخوا اور بلوچستان میں نہیں؟
انہوں نے کہا کہ سندھ کیلیے بدامنی کیس میں عدالت آئین ہی الگ کر دیتی ہے، کوئی جج آ کر کہہ دیتا ہے 50 کی دہائی والا کراچی چاہیے، اب ایسے تو شہر میں معاشی مواقع ضائع ہو جائیں گے، 50 کی دہائی والے کراچی پر جائیں تو نہ بلڈنگ بنیں نہ کچھ ہو۔
ان کا کہنا تھا کہ اسٹیبلشمنٹ اختیار کا غلط استعمال کرے تو میں کم از کم بول تو سکتا ہوں لیکن عدلیہ کے غلط اختیار کے استعمال پر بولنے پر تو توہین لگ جاتی ہے۔
بلاول بھٹو زرداری نے مزید کہا کہ آئینی عدالت کے سربراہ قاضی فائز عیسیٰ ہوں یا جسٹس منصور 3 سال کیلیے ہوں گے، جسٹس منصور علی شاہ پر یقین ہے وہ اختیارات کا غلط استعمال نہیں کرتے، ہم نے صدر سے سارے اختیارات لے کر وزیر اعظم کو دیے تو عدالت کے کیوں نہیں؟
