اسلام آباد: چیئرمین پیپلزپارٹی بلاول بھٹو زرداری نے کہا ہے کہ نیب نے فریال تالپور کو گرفتار کرکے گھر کو سب جیل بنادیا ہے، پیپلزپارٹی ہر محاذ پر لڑے گی، فریال تالپور بہادر خاتون ہیں، نیب کو سیاسی انتقام اور پولیٹیکل انجینئرنگ کے لیے بنایا گیا ہے۔
تفصیلات کے مطابق چیئرمین پیپلزپارٹی بلاول بھٹو نے فریال تالپور کی گرفتاری پر ردعمل دیتے ہوئے کہا کہ ملک میں سیاسی مخالفین کو نشانہ بنایا جارہا ہے، ملک میں سیاسی انتقام، سیاسی انجیئنئرنگ کی جارہی ہے، پرویز مشرف نے نیب کو سیاسی انتقام کے لیے بنایا تھا۔
انہوں نے کہا کہ آصف زرداری کو بجٹ سیشن کے دن گرفتار کرایا جاتا ہے، گرفتاریاں معاشی قتل اور معاشی دہشت گردی سے توجہ ہٹانے کے لیے ہیں، پی ٹی آئی کا آئی ایم ایف کا بجٹ معاشی خودکشی ہے۔
بلاول بھٹو نے کہا کہ پیپلزپارٹی نے آمروں کے ہر دور کا مقابلہ کیا یہ کیا چیز ہیں، حکومت غریبوں کا معاشی قتل کررہی ہے ہم خاموش نہیں رہیں گے، پیپلزپارٹی جمہوری عمل کو ڈی ریل نہیں ہونے دے گی۔
مزید پڑھیں: جعلی اکاؤنٹس کیس: نیب نے فریال تالپورکوگرفتارکرلیا
چیئرمین پیپلزپارٹی نے کہا کہ حکومت ججوں کے خلاف استعمال ہورہی ہے، مشرف نے عدلیہ پر حملہ کیا آج وہی حملہ عدلیہ پر کیا جارہا ہے، اسکرپٹ سے ہٹ کر چلنے والے ججز کے خلاف ایکشن ہورہا ہے۔
بلاول بھٹو نے کہا کہ عوام پوچھ رہے ہیں ڈالر 158 روپے کا کیسے ہوگیا، اے پی سی جلد ہوگی متحد اپوزیشن کا متحد لائحہ عمل جلد سامنے آئے گا۔
انہوں نے کہا کہ خان صاحب کی حکومت کو آج بھی گراسکتے ہیں مگر نہیں گرا رہے ہیں، ہم چاہتے ہیں حکومت اپنی آئینی مدت پوری کرے۔
