اسلام آباد: وزیر خارجہ بلاول بھٹو کا کہنا ہے کہ موسمی تبدیلیوں کے باعث پاکستان میں اس بار اپریل سے ہی بارشیں شروع ہوگئیں، امیر ممالک کے پیدا کردہ موسمیاتی بحران کا خمیازہ غریب اقوام بھگتنے پر مجبور ہیں۔
تفصیلات کے مطابق وزیر خارجہ بلاول بھٹو نے ملک کے مختلف علاقوں میں بارش کی صورتحال پر کہا ہے کہ امیر ممالک کے پیدا کردہ موسمیاتی بحران کا خمیازہ غریب اقوام بھگتنے پر مجبور ہیں۔
وزیر خارجہ نے بارش کے دوران حادثات میں قیمتی جانوں کے ضیاع پر رنج و غم کا اظہار بھی کیا۔
بلاول بھٹو کا کہنا تھا کہ موسمی تبدیلیوں کے باعث پاکستان میں اس بار اپریل سے ہی بارشیں شروع ہوگئیں، بلوچستان سمیت ملک کے مختلف علاقوں کے ندی نالوں میں طغیانی کی صورتحال ہے۔
انہوں نے کہا کہ گزشتہ ریکارڈ بارشوں کے متاثرین کی بڑی تعداد ابھی بھی مدد کی منتظر ہے، بہہ جانے والے لاکھوں گھروں اور انفراسٹرکچر کی از سر نو بحالی کا کام ابھی مکمل نہیں ہوا۔
وزیر خارجہ کا کہنا تھا کہ این ڈی ایم اے سمیت تمام متعلقہ اداروں اور حکام بارشوں کے پیش نظر ہمہ وقت چوکس رہیں، بارشوں کے دوران عوام احتیاطی تدابیر اختیار کریں اور سفر کرنے سے بھی اجتناب برتیں۔
