خیرپور: وزیر خارجہ پاکستان بلاول بھٹو زرداری نے کہا ہے کہ تخت لاہور کی لڑائی پاکستان کو لے ڈوبے گی، پورے پاکستان کو لیکچرز دیے جاتے ہیں کہ کون کرپٹ ہے اور کون سسیلین مافیا، ملک کے ساتھ طاقت ور طبقے نے کھیل کھیلا ہے۔
تفصیلات کے مطابق سندھ کے شہر خیرپور میں پاکستان پیپلز پارٹی کے چیئرمین اور وزیر خارجہ بلاول بھٹو نے گمبٹ میں ملک کے پہلے ہیلتھ سٹی کا سنگ بنیاد رکھ دیا، انھوں نے پاکستان کے پہلے پھیپھڑوں کی پیوند کاری کے مرکز کا افتتاح کیا۔
اس موقع پر خطاب کرتے ہوئے بلاول بھٹو نے کہا نفرت اور تقسیم کی سیاست کی بجائے منشور کی سیاست پر مقابلہ کرتے تو عوام کا فائدہ ہوتا، اس ملک کی نسلوں کے ساتھ طاقت ور طبقے نے کھیل کھیلا ہے، طاقت کی لڑائی میں عوام کا فائدہ نظرانداز ہو جاتا ہے۔
بلاول بھٹو نے کہا کہ سپریم کورٹ میں چیف جسٹس اپنے اختیارات دیگر ججز سے شیئر کرنے کو تیار نہیں ہیں، آصف زرداری نے بطور صدر اپنے اختیارات پارلیمنٹ کو منتقل کیے، اور یہ پورے پاکستان کو لیکچرز دیتے ہیں کہ کون کرپٹ ہے کون نہیں، یہ لیکچر دیتے ہیں کہ کون سسیلین مافیا ہے کون نہیں ہے۔
انھوں نے کہا ہم پر نالائق اور نااہل وزیر اعظم مسلط کیا گیا جس نے معاشی بحران پیدا کیا، جب سارے صوبوں کا حق مارا جا رہا تھا تو از خود نوٹس کہاں تھا، تخت لاہور کی لڑائی پاکستان کو لے ڈوبے گی۔
وزیر خارجہ کا کہنا تھا کہ تخت لاہور کی لڑائی کی وجہ سے سندھ کے عوام کا نقصان نہیں ہونا چاہیے، ہم تخت لاہور میں جا کر بیٹھ کر غیر جمہوری قوتوں کو منہ کی دیں گے، تخت لاہور میں بیٹھیں گے اور جواب دیں گے۔
