اسلام آباد: وزیر خارجہ بلاول بھٹو اگلے 2 ماہ میں امریکا کے 3 دورے کریں گے، اپنے دوروں کے دوران وہ مسلم خواتین اور اسلامو فوبیا کے حوالے سے الگ الگ منعقدہ تقاریب میں شرکت کریں گے۔
تفصیلات کے مطابق وزیر خارجہ بلاول بھٹو اگلے 2 ماہ میں امریکا کے 3 دورے کریں گے، بلاول بھٹو 7 فروری کو امریکن کونسل آف چرچز کے دعائیہ ناشتے میں شرکت کریں گے۔
امریکی صدر جو بائیڈن بھی بطور خاص اس ناشتے میں شرکت کریں گے، امریکی صدر تقریب سے خطاب بھی کریں گے، خطاب کے بعد وہ شرکا سے ملاقاتیں کریں گے۔
اس کے بعد 8 مارچ کو وزیر خارجہ مسلم خواتین کے حوالے سے عالمی کانفرنس میں شرکت کریں گے۔
وزیر خارجہ 18 مارچ کو اسلامو فوبیا کے حوالے سے خصوصی تقریب میں شرکت بھی کریں گے، یاد رہے کہ مسلم ممالک نے جنرل اسمبلی میں اسلامو فوبیا کے خلاف عالمی دن منانے کی تحریک پیش کی تھی جس کے بعد اقوام متحدہ نے ہر سال 15 مارچ کو یہ دن عالمی سطح پر منانے کی منظوری دی تھی۔
رواں سال مارچ میں پہلی دفعہ یہ دن منایا جائے گا، اقوام متحدہ 18 مارچ کو اسلامو فوبیا کے حوالے سے خصوصی تقریب منعقد کر رہا ہے جس میں بلاول بھٹو پاکستان کی نمائندگی کریں گے۔
