پی پی پی چیئرمین اور وزیر خارجہ بلاول بھٹو زرداری نے کہا ہے کہ 10 اپریل پاکستان میں ہمیشہ سے تاریخی حیثیت کا حامل رہا ہے۔
اے آر وائی نیوز کے مطابق پاکستان پیپلز پارٹی کے چیئرمین اور وزیر خارجہ بلاول بھٹو زرداری نے سماجی رابطوں کی ویب سائٹ ٹوئٹر پر 10 اپریل کے حوالے سے پاکستان میں ہونے والے واقعات کا ذکر کرتے ہوئے کہا ہے کہ 10 اپریل پاکستان میں ہمیشہ سے تاریخی حیثیت کا حامل رہا ہے۔
بلاول بھٹو نے اپنے ٹویٹ میں لکھا ہے کہ 10 اپریل 1973 کو ہمیں ملک کا آئین ملا۔ 10 اپریل 1986 کو لاہور میں شہید بینظیر بھٹو کا تاریخی استقبال ہوا۔
پی پی چیئرمین نے مزید لکھا کہ 10 اپریل 2022 کے دن ہی ملک کی تاریخ میں پہلی بار کسی وزیراعظم کے خلاف تحریک عدم اعتماد کامیاب ہوئی اور 10 اپریل کو ہی ایک سلیکٹڈ ریجکٹڈ ہو کر پارلیمان سے نکالا گیا۔
پاکستان پیپلزپارٹی کے چیئرمین اور وزیرخارجہ بلاول بھٹو زرداری کا پیغام
10 اپریل پاکستان میں ہمیشہ سے تاریخی حیثیت کا حامل رہا ہے، چیئرمین بلاول بھٹو زرداری
10 اپریل وہ تاریخ ہے کہ جب 1973 میں ہمیں آئین ملا، چیئرمین بلاول بھٹو زرداری https://t.co/ex5S5wgOp3
— PPP (@MediaCellPPP) April 10, 2023
علاوہ ازیں بلاول بھٹو نے آئین کی گولڈن جوبلی پر اپنے پیغام میں قوم کو مبارک باد دیتے ہوئے کہا ہے کہ 1973 کا آئین ہمارا قومی لائحہ عمل اور وفاق کی زنجیر ہے جو ذوالفقار علی بھٹو کا قوم کو تحفہ اور امانت ہے۔
انہوں نے کہا کہ 1973 کا آئین پاکستان کا حقیقی معنوں میں آئینہ دار اور ہماری قومی یکجہتی واتحاد کی ضمانت ہے۔ آئین بنانے میں کردار ادا کرنے والے تمام سیاسی رہنماوَں کو سلام پیش کرتا ہوں۔
پی پی چیئرمین نے کہا کہ آئین کو بنانے اور بچانے کے حوالے سے پیپلز پارٹی کی تاریخ بے مثال ہے۔ جب سے آئین بنا ہے، اس پر حملے کیے جاتے رہے ہیں۔ کچھ قوتوں سے یہ برداشت نہیں ہوتا کہ عوام کو ان کا حق ملے۔