لاہور: پیپلز پارٹی کے چیئرمین بلاول بھٹو زرداری نے کہا ہے کہ میاں صاحب پہلے آپ اپنا ماضی دیکھیں پھر ہم سے گلہ کریں، وہ اپنا بویا ہوا ہی کاٹ رہے ہیں، ہمیں ن لیگ سے جمہوریت پسندی کا سرٹیفکیٹ نہیں لینا۔
یہ بات انہوں نے نواز شریف کی جانب سے دیئے گئے ایک بیان کے جواب میں کہی، لاہور میں میڈیا سے گفتگو کرتے ہوئے بلاول بھٹو زرداری نے کہا کہ نواز شریف سے جب جب ہاتھ ملایا تب تب انہوں نے ہمیں دھوکا دیا۔
اے آر ڈی سے سی او ڈی اور سی او ڈی سے مشرف کیس تک دھوکے میں رکھا، نواز شریف اپنا بویا ہوا کاٹ رہے ہیں، ہم سے کیسا گلہ؟
بلاول بھٹو کا مزید کہنا تھا کہ ناانصافی کی باتیں کرنے والے نوازشریف نے پی سی او ججز کو تحفظ دیا، میاں صاحب نے افتخار چوہدری کی محبت میں میثاق جمہوریت توڑا تھا، انہوں نے ہمیشہ پیپلز پارٹی کی جمہوریت پسندی کو استعمال کیا۔
ان کا کہنا تھا کہ پیپلزپارٹی کی جمہوری جدوجہد اور قربانیاں قوم کے سامنےعیاں ہیں، ہمیں ن لیگ سےجمہوریت پسندی کا سرٹیفکیٹ نہیں لینا۔
نااہل سابق وزیر اعظم پہلے جمہوریت کے خلاف اپنے جرائم کا جواب دیں۔ لہٰذا میاں صاحب پہلے آپ اپنا ماضی دیکھیں پھر ہم سےگلہ کریں۔
مزید پڑھیں: تکلیف ہوتی ہے جب پیپلز پارٹی کالے قانون کو سپورٹ کرے،نوازشریف
واضح رہے کہ نااہل سابق وزیر اعظم کا گزشتہ روز قومی اسمبلی میں پیپلز پارٹی کی جانب سے بل پیش کیے جانے پر میڈیا سے گفتگو میں کہنا تھا کہ پیپلزپارٹی کی کل جو تصویر دیکھی اس پریقین نہیں آرہا۔
تکلیف ہوتی ہے جب پیپلز پارٹی کالے قانون کو سپورٹ کرے، میثاق جمہوریت پر آج تک قائم ہوں۔
