نیویارک: وزیرخارجہ بلاول بھٹو نے اقوام متحدہ میں بھارت کو کرارا جواب دیتے ہوئے کہا کہ بعض ملکوں میں اقلیتوں پر ہونے والے مظالم پر دنیا کی خاموشی جرم ہوگی، کشمیر پر سلامتی کونسل کی قراردادیں عملدرآمد کی منتظر ہیں۔
تفصیلات کے مطابق اقوام متحدہ کی سلامتی کونسل میں بین الاقوامی امن کی بحالی کے عنوان پر مباحثہ ہوا، جس میں وزیرخارجہ بلاول بھٹو نے اظہارخیال کرتے ہوئے کہا آج دنیا کو بہت سے چیلنجز کا سامنا ہے، عالمی سطح پر قیام امن کے ساتھ سماجی اورمعاشی ترقی کا چیلنج بھی درپیش ہے، کوپ 27 میں لاس اینڈ ڈیمج فنڈ کا قیام بڑی پیشرفت ہے۔
وزیرخارجہ کا کہنا تھا کہ بین الاقوامی سطح پرانصاف کیلئےاقوام متحدہ پراہم ذمہ داری عائدہوتی ہے،ب عالمی امن اورمتعلقہ مسائل کاحل سلامتی کونسل کی ذمہ داری ہے۔
بلاول بھٹو نے کہا کہ کورونا ہو یا انسانی حقوق کا معاملہ، دہشت گردی ہو یا موسیاتی تباہیاں ہر شعبے میں کردار بڑھ گیا ہے، کسی بھی تنازع کے فریق ملک دوطرفہ معاملہ کہہ کر توجہ نہیں ہٹاسکتے، سلامتی کونسل تسلیم شدہ تنازعات کے حل میں مؤثر کردار ادا کرے۔
وزیرخارجہ نے بھارت کو کرارا جواب دیتے ہوئے کہا کہ بعض ملکوں میں اقلیتوں پر ہونے والے مظالم پر دنیا کی خاموشی جرم ہوگی، بھارت میں بڑھتی ہوئی نفرت،اسلاموفوبیا اورانتہا پسندی کا مقابلہ کرنا ہوگا۔
انھوں نے روز دیا کہ دیرینہ تنازعات کوکونسل کی قراردادوں کےمطابق حل ہونا چاہیے، کشمیر پر سلامتی کونسل کی قراردادیں عملدرآمد کی منتظر ہیں۔
بلاول بھٹو کا کہنا تھا کہ سلامتی کونسل میں توسیع بالادستی کی بجائے برابری کی بنیاد پر ہونی چاہیے، مزید ملکوں کو ویٹو پاور دینے سے عالمی سطح پر خلیج بڑھے گی، قراردادوں پرعملدرآمدنہ کرنےوالےملک مستقل رکن کیسے بن سکتےہیں؟
