لاہور: پاکستان پیپلز پارٹی کے چیئرمین بلاول بھٹو زرداری نے جیل میں شہباز شریف سے ملنے کی خواہش ظاہر کر دی ہے۔
تفصیلات کے مطابق بلاول بھٹو نے شہباز شریف سے کوٹ لکھپت جیل میں کل ملنے کے لیے درخواست دے دی ہے، حکومتی ذرائع نے بلاول بھٹو کی درخواست کی تصدیق کر دی۔
ذرائع کا کہنا ہے کہ دونوں رہنماؤں کے درمیان ملاقات میں اہم امور پر تبادلہ خیال کیا جائے گا۔
واضح رہے کہ آج کا جلسہ لاہوریوں نے مسترد کر دیا، اس حوالے سے ملاقات میں پی ڈی ایم کے مستقبل کے بارے میں بھی گفتگو کی جائے گی، جب کہ حکومت کے خلاف تحریک کے لائحہ عمل کے لیے بھی مشاورت ہوگی۔
پی ڈی ایم جلسے میں شدید بدنظمی، متعدد اہم رہنماؤں کو اسٹیج پر جانے سے روک دیا گیا
پیپلز پارٹی کے ذرائع نے بھی ملاقات کی تصدیق کر دی ہے، بتایا گیا کہ آئی جی جیل خانہ جات کو درخواست دے دی گئی ہے، دونوں رہنماؤں کی ملاقات کے وقت کا تعین جیل انتظامیہ کے مطابق ہوگا۔
خیال رہے کہ آج گیارہ جماعتیں بھی ایک میدان بھرنے میں ناکام رہیں، ن لیگ اپنے گڑھ میں ہی لوگوں کو نکالنے میں ناکام رہی، کہا جا رہا ہے کہ جس شہر میں 13 ایم این ایز ہوں وہاں تو عوامی سمندر ہونا چاہیے تھا۔
جلسے کی تعداد کے حوالے سے مختلف آرا سامنے آ رہی ہیں، پولیس ذرائع کے مطابق جلسے میں 8 ہزار سے ساڑھے 8 ہزار لوگ موجود ہیں، اسپیشل برانچ کے مطابق ساڑھے 9 ہزار سے 10 ہزار لوگ موجود ہیں، جب کہ آزاد ذرائع کے مطابق جلسے میں 9 ہزار سے 10 ہزار افراد موجود ہیں۔
