بیشکک سے پاکستانی طالب علموں کو ایمرجنسی حالات میں وطن واپس لانے کے لیے پروازوں سے متعلق پی آئی اے نے وضاحت دے دی۔
ترجمان کے مطابق پی آئی اے گزشتہ 4 دنوں میں بیشکک کیلئے 8 خصوصی پروازیں آپریٹ کر چکی ہیں ان پروازوں کے ذریعے تقریباً 1368 طالبعلم بحفاظت وطن واپس پہنچ چکےہیں۔
ترجمان نے واضح کیا کہ پی آئی اے کے آپریشن میں بیشکک کیلئے مزید 2 خصوصی پروازیں بھی شامل ہیں ان میں سے ایک پرواز آج رات 12 بجے لاہور سے روانہ ہو گی اور دوسری پرواز کل صبح 8 بجے اسلام آباد سے بیشکک کے لیے روانہ ہوگی۔ ان دونوں پروازوں کے ذریعے مزید 348 طالب علم وطن پہنچیں گے۔
ترجمان نے بتایا کہ پروازیں اسلام آباد، کراچی، لاہور،پشاور، کوئٹہ سمیت مختلف شہروں کیلئے آپریٹ کر رہی ہے قومی ایئرلائن حکومت پاکستان کی ہدایات اور ضروریات کے مطابق پروازیں چلارہی ہیں ضرورت پڑنے پر مزید پروازوں کی بھی منصوبہ بندی کی جارہی ہے، ہنگامی حالات میں ہم وطنوں کی مدد کرنا پی آئی اے کی ترجیحات میں شامل ہیں۔
