لکھنؤ: بھارتی ریاست اترپردیش میں سماج وادی پارٹی چھوڑ کر بی جے پی میں شمولیت اختیار کرنے والے سیاسی رہنما کے منہ پر ناراض کارکن نے سیاہی پھینک دی۔
بھارتی میڈیا رپورٹس کے مطابق بھارتی ریاست اترپردیش میں مقامی رہنما دارا سنگھ چوہان ضلع ماؤ کے ایک قصبے میں انتخابی مہم کے لیے پہنچے تھے، جہاں ان پر کسی ناراض کارکن نے سیاہی پھینک دی۔
دارا سنگھ کو اس رد عمل کا سامنا سماج وادی پارٹی چھوڑ کر بی جے پی میں شمولیت پر کرنا پڑا، واقعے کی ویڈیو سوشل میڈیا پر وائرل ہوئی ہے، جس میں ان کے منہ پر سیاہی پھینکتے دیکھا جا سکتا ہے۔
بی جے پی نے دارا سنگھ چوہان کو ماؤ ضلع میں 5 ستمبر کے گھوسی ضمنی انتخابات کے لیے اپنا امیدوار نامزد کیا تھا، اتوار کو انتخابی مہم کے دوران یہ نا خوش گوار واقعہ رونما ہوا۔
VIDEO | Ink was thrown at BJP candidate Dara Singh Chauhan in Mau, Uttar Pradesh during the election campaign, earlier today. "Efforts are underway to nab the accused," said Additional SP Mahesh Singh Attri. pic.twitter.com/vE1VE4zCiR
— Press Trust of India (@PTI_News) August 20, 2023
دارا سنگھ نے 2022 میں سماج وادی پارٹی کے ٹکٹ پر الیکشن جیتا تھا لیکن انھوں نے اسمبلی کی سیٹ سے استعفیٰ دے دیا اور اب اسی سیٹ سے بی جے پی کے ٹکٹ پر الیکشن لڑ رہے ہیں۔ دارا سنگھ کو سماج وادی پارٹی چھوڑ کر بی جے پی سے الیکشن لڑنے پر عوامی غصے کا سامنا کرنا پڑ رہا ہے۔
سیاہی پھینکنے کے بعد وہ انتخابی مہم ادھوری چھوڑ کر وہاں سے روانہ ہو گئے جب کہ سیاہی پھینکے والا شخص بھی وہاں سے فرار ہو گیا، پولیس نے جس کی تلاش شروع کر دی ہے۔
