درخت فضا میں پھیلی کاربن ڈائی آکسائیڈ کو جذب اور ہوا کی آلودگی کو کم کرکے انسان دوست ماحول فراہم کرتے ہیں۔ لیکن براعظم افریقہ میں ایک درخت ایسا بھی پایا جاتا ہے جسے اگر کاٹا جائے تو خون بہنے لگتا ہے۔
غیر ملکی ذرائع ابلاغ کے مطابق جنوبی افریقہ میں پایا جانے والا درخت جس کو اگر کاٹا جائے تو اس سے خون کی طرح کا سیال بہنا شروع ہوجاتا ہے۔
اس درخت کی لکڑی کو اعلیٰ معیار کا فرنیچر اور موسیقی کے آلات بنانے کے لیے استعمال میں لایا جاتا ہے، افریقہ کے خط استوا میں رہنے والے لوگ اس درخت سے واقف ہیں۔
حیاتیاتی زبان میں اس درخت کو Pterocarpus angolensis کہا جاتا ہے، یہ درخت جو کاٹنے پر اپنا’خون‘ بہاتا ہے اسے مقامی طور پر’بلڈ ووڈ‘ کے نام سے جانا جاتا ہے۔
بلڈووڈ کی سب سے اہم خوبی یہ ہے کہ اس درخت کو آگ متاثر نہیں کرتی، اسی لیے افریقی ممالک میں اس کی کاشت ان تعمیرات کے ارد گرد بھی کی جاتی ہے جن کا مقصد آگ سے محفوظ رہنا ہوتا ہے۔
یہ قدرتی طور پر دیمک کے خلاف مزاحمت کرتا ہے اور اس کی لکڑی میں خوشگوار خوشبو ہوتی ہے، افریقی ساگون کے اس درخت میں کئی منفرد قسم کی خصوصیات پائی جاتی ہیں۔
خون جیسا مادہ ہونے کے باعث مقامی آبادی کا ماننا ہے کہ اس درخت میں خون کی بیماریوں کو دور کرنے کی جادوئی طاقتیں موجود ہیں۔مگر طبی تحقیق میں اس کے شواہد نہیں مل سکے۔
ماہرین حیاتیات کہتے ہیں کہ بلڈ ووڈ کا ”خون کے رنگ کا سیال“ درخت کو اس کے ذائقے اور ہاضمے کی خرابی کی وجہ سے جانوروں کے لیے ناگوار بنا دیتا ہے۔ تو یہ اس کا قدرتی دفاعی نظام ہے جو اسے دیمک جیسے جانوروں اور کیڑوں کی خوراک بننے سے محفوظ رکھتا ہے۔
