واشنگٹن : امریکہ میں برفانی طوفان کی وجہ سے 5500 سے زیادہ پروازیں منسوخ کردی گئی ہیں، ایک میٹر سے زیادہ برف گری۔
یہ بات واشنگٹن پوسٹ نے اپنی ایک تازہ رپورٹ میں بتائی۔ اس سے قبل میڈیا نے بتایا تھا کہ امریکہ میں پیر کی صبح تک شدید سردی اور طوفان سے متعلق واقعات کی وجہ سے کم از کم 50 افراد ہلاک ہوچکے ہیں۔
رپورٹ میں مزید بتایا گیا ہے کہ برفانی طوفان کے باعث پیر کی شام موسم کی خرابی کے پیش نظر ساڑھے پانچ ہزار سے زائد پروازیں منسوخ کردی گئی ہیں۔
این بی سی نیوز نے رپورٹ کیا کہ کولوراڈو، الینوائس، کنساس، کینٹکی، مشی گن، مسوری، نیبراسکا، نیویارک، اوہائیو، اوکلاہوما، ٹینیسی اور وسکونسن سمیت کم از کم 12 ریاستوں میں کل 50 اموات کی اطلاع ہے۔
شمال مشرقی نیو یارک ریاست کے شہر بفیلو میں ہفتے کے آخر میں ایک میٹر سے زیادہ برف گرنے کے بعد سب سے زیادہ ہلاکتیں ہوئیں۔ اطلاعات کے مطابق صرف پیر کی شام تک کم از کم 14 افراد ہلاک ہوچکے تھے۔