پشاور: بم ڈسپوزل یونٹ نے پولیس لائنز کی مسجد میں ہونے والے دھماکے کی ابتدائی رپورٹ تیار کرلی۔
تفصیلات کے مطابق پشاور پولیس لائن کی مسجد میں ہونے والے دھماکے کی بم ڈسپوزل یونٹ کی رپورٹ سامنے آگئی۔
بم ڈسپوزل یونٹ نے سینٹرل پولیس آفس کورپورٹ ارسال کردی ، جس میں بتایا گیا ہے کہ بم ڈسپوزل اسکواڈ کو جائے وقوعہ سے بال بیئرنگ نہیں ملے، زیادہ اموات چھت گرنے کے باعث ہوئیں۔
بم ڈسپوزل یونٹ کا کہنا ہے کہ جائے وقوعہ پر کوئی گڑھے کے شواہد بھی نہیں ملے تاہم ملباہٹنےکےبعد مزید شواہد اکٹھے کیےجائیں گے۔
دوسری جانب پولیس لائنزکی مسجد میں خودکش دھماکے کی تحقیقات جاری ہے۔
تحقیقاتی ادارے کی جانب سے آج مبینہ طور پر ملوث خود کش حملہ آور کے اعضاء ڈی این اے ٹیسٹ کیلئے بھجوائیں جائیں گے۔
تحقیقاتی ٹیموں نے پولیس لائنز کے تمام سٹاف کی پروفائلنگ بھی شروع کردی ہے، پولیس لائنز اور اطراف کی تمام سی سی ٹی وی فوٹیجز بھی حاصل کرلی گئی ہے۔
یاد رہے پولیس لائنزکی مسجد میں خودکش دھماکےمیں شہداء کی تعداد 100 ہوگئی ہے ، ترجمان لیڈی ریڈنگ اسپتال کے مطابق ترپن مریض زیرعلاج ہیں جس میں سات زخمی آئی سی یو میں ہیں۔
