لندن: برطانوی وزیر اعظم بورس جانسن کرونا وائرس کو شکست دینے کے بعد اب سوموار سے اپنی دفتری ذمہ داریاں سنبھال لیں گے، انہیں اسپتال سے ڈسچارج ہوئے 2 ہفتے ہوچکے ہیں۔
10 ڈاؤننگ اسٹریٹ ترجمان کی جانب سے کہا گیا ہے کہ برطانوی وزیر اعظم بورس جانسن سوموار کے روز دفتر سنبھالیں گے، بورس جانسن اس سے قبل زوم پر متعدد میٹنگز میں شریک ہورہے تھے۔
جمعے کے روز بورس جانسن نے ساتھیوں سے مشاورت کی تھی، انہیں کرونا وائرس پر حکومتی اقدامات کے متعلق بریفنگ دی گئی تھی۔ بورس جانسن اپنی جگہ ذمہ داریاں ادا کرنے والے ڈومینک راب سے بھی رابطے میں رہے۔
وزیر اعظم بورس جانسن کو اسپتال سے ڈسچارج ہوئے 2 ہفتے ہوچکے ہیں۔
خیال رہے کہ برطانوی وزیر اعظم کرونا وائرس کا شکار ہوگئے تھے، ان کی حالت بگڑنے پر انہیں 3 دن انتہائی نگہداشت کے وارڈ (آئی سی یو) میں رکھا گیا تھا۔
تاہم انہوں نے کرونا وائرس کو شکست دی اور اب جلد ہی سرکاری ذمہ داریاں سنبھال لیں گے، ان کی بیماری کے دوران دنیا بھر کے لیڈرز نے ان کے لیے دعائیہ پیغامات بھجوائے۔
برطانیہ میں مجموعی طور پر اب تک 1 لاکھ 48 ہزار سے زائد افراد کرونا وائرس سے متاثر ہوچکے ہیں، جبکہ 20 ہزار سے زائد اموات بھی ہوچکی ہیں۔
