پاکستان میں دکانوں اور سڑکوں پر پھولوں کے گلدستے فروخت کیے جاتے ہیں مگر کیا آپ جانتے ہیں کہ اکثر گلدستوں میں ایک پھول زہریلا ہوتا ہے؟
پھول اللہ تعالیٰ کی خوبصورت نعمتوں میں سے ایک ہیں۔ یہ خوشبودار ہونے کے ساتھ ماحول اور انسان کی نفسیات پر بھی مثبت اثر ڈالتے ہیں۔
ہر خوشی یا تہوار کے موقع پر اپنے پیاروں کو پھولوں کے گلدستے بھیجنا ہماری روایت میں شامل ہوچکا ہے۔ ملک بھر میں دکانوں اور سڑکوں پر گل فروش خوبصورت گلدستے فروخت کرتے دکھائی دیتے ہیں۔ ان گلدستوں کی خوبصورتی میں اضافے کے لیے کئی اقسام کے چھوٹے بڑے پھول استعمال کیے جاتے ہیں۔
لیکن کیا آپ جانتے ہیں کہ اکثر گلدستوں کی خوبصورتی بڑھانے کے لیے استعمال کیا جانے والا سفید رنگ کا ایک چھوٹا سا پھول اپنی تاثیر میں زہریلا ہے۔
گلدستوں میں استعمال ہونے والا سفید رنگ کا یہ چھوٹا پھول دراصل پاکستان کے کھیتوں میں پیدا ہونے والی خود رو گھاس پارتھینیم میں لگتا ہے، جس کو طبی ماہرین انسانی صحت کے لیے انتہائی خطرناک قرار دیتے ہیں۔
پاکستان میں پارتھینیم نامی خودرو گھاس جسے مقامی سطح پر ’گاجر بوٹی‘ کہا جاتا ہے۔ یہ گھاس اب دیہی اور شہری علاقوں میں تیزی سے پھیل رہی ہے۔ شہروں میں اس گھاس کو گلدستوں میں پھولوں کے ساتھ بکثرت استعمال کیا جاتا ہے۔
پارتھینیم گھاس کو دنیا بھر میں ایک خطرناک ترین جڑی بوٹی سمجھا جاتا ہے، جو تقریبا 48 ممالک میں ماحول، انسانی صحت، کھڑی فصلوں اور معیشت پر نا قابل تلافی اثرات مرتب کر چکی ہے۔
طبی ماہرین اس کو انسانی صحت کے لئے انتہائی خطرناک اور زندگی بھر صحت کے مسائل کا باعث قرار دیتے ہیں۔
ماہرین کا کہنا ہے کہ پارتھینیم پودے کے نقصانات سے دکانداروں کے ساتھ ساتھ خریدار بھی لاعلم ہیں۔ اس کے نقصانات سے بچنے کے لیے ملکی سطح پر آگہی کی شدید ضرورت ہے۔
