لاہور: زندہ دلان لاہور کی باہمت لڑکی کائنات اپنی تعلیم مکمل کرنے اور گھر کی کفالت کے لیے پولیو ورکر بن کر دوسروں کے لیے ایک مثال بن گئی ہیں۔
اے آر وائی نیوز کے مطابق لاہور کینٹ ٹاؤن کی طالبہ کائنات بچوں کو گھر گھر جا کر پولیو کے قطرے پلاتی ہیں، بچوں کو قطرے پلانے کے ساتھ ساتھ والدین کو ویکسین کی افادیت کے بارے میں آگاہی بھی فراہم کرتی ہیں۔
کائنات کا کہنا ہے کہ ویکسین کے لیے بچوں کے والدین کو راضی کرنے کے لیے وہ دل سے محنت کرتی ہیں، بہت سارے بچے ایسے ہیں جو اس بیماری کی وجہ سے معذور ہو چکے ہیں، جو بستر سے اٹھ نہیں سکتے، چل نہیں سکتے، مجھے خوشی ہے کہ اللہ نے مجھے اس قابل بنایا کہ میں بچوں کی زندگیوں کو محفوظ بنانے میں اپنا کردار ادا کر رہی ہوں۔
کائنات نے اے آر وائی نیوز سے بات کرتے ہوئے کہا میں نے پولیو ورکر بن کر پچھلے سال اپنا بی ایس سی مکمل کر لیا ہے اور اب ماسٹر بھی کروں گی۔
ڈپٹی ڈسٹرکٹ ہیلتھ آفیسر کینٹ ٹاؤن ڈاکٹر جنید کا کہنا ہے کہ کائنات ایک محنتی لیڈی ہیلتھ ورکر ہے، انھوں نے بتایا کہ کائنات کو جو تنخواہ ملتی ہے وہ اسی میں اپنی تعلیم مکمل کر رہی ہیں۔
واضح رہے کہ ملک کو پولیو سے پاک کرنے کے لیے کائنات جیسے ورکرز کا کردار بہت اہم ہے، کائنات کا شمار ان خواتین ورکرز میں ہوتا ہے جو علم سے اپنی دنیا روشن کرنے اور بچوں کو معذوری سے بچانے کا مشن لے کر گھر سے نکلتی ہیں۔
