کراچی : گھر میں روٹیاں بنانا واقعتاً ایک مشکل کام ہے جسے عموماً گھریلو خواتین بہت مستعدی سے انجام دیتی ہیں اور اس عمل میں وقت اور محنت دونوں درکار ہوتی ہیں۔
اس سے پہلے کہ ہم بہترین روٹی بنانے کے آسان طریقے کے بارے میں بات کرنا شروع کریں آپ کو یہ بتاتے چلیں کہ اب روٹی بنانا بہت آسان ہوگیا ہے۔
آپ سوچ رہے ہوں گے کہ ایسی کیا چیز ہے جو اتنا مشکل کام آرام سے کرسکے، جی ہاں !! کراچی کے دو نوجوانوں نے روٹیاں پکانے والی ایک ایسی مشین بنائی ہے جو محنت کے ساتھ ساتھ آپ کا وقت بھی بچاتی ہے۔
اے آر وائی نیوز کے پروگرام باخبر سویرا میں کراچی کے دوطلباء نبیل لودھی اور محمد طٰحہ مرزا نے اپنی اس کاوش کے بارے میں سننے والوں کوآگاہ کیا۔
انہوں نے بتایا کہ کورونا لاک ڈاؤن کے ایام میں ہم نے سوچا کہ اس مہنگائی کے دور میں کچھ ایسا بنایا جائے جو ہر شہری کی ضرورت ہو اور اس کی قیمت بھی کم ہو۔
اسی سوچ کے پیش نظر ہم نے ایک پروجیکٹ پر کام شروع کیا جس کا تعلق روٹی بنانے سے ہے، ہم نے ایک ایسی مشین بنائی ہے جو کم وقت میں زیادہ روٹیاں تیار کرسکتی ہے اور اس میں افرادی قوت بھی کم ہوتی ہے۔
ان کا کہنا تھا کہ یہ پاکستان کی پہلی آٹو میٹک مشین ہے، اب آٹا گوندھنے اور پیڑے بنانے کی بھی ضروت نہیں رہے گی، اس مشین میں دو بیلن بھی لگائے گئے ہیں جو پیڑے کو گول بناتے ہیں،۔
نبیل لودھی اور محمد طٰحہ مرزا نے بتایا کہ پورے شہر میں سروے کے بعد ہمیں اس کا اچھا رسپانس ملا، اس مشین کے ذریعے آٹا گوندھنے سے لے کر روٹی تیار ہونے تک کے تمام مراحل مشین ہی پورے کرتی ہے۔
