نئی دہلی : بھارت میں شادی کی تقریب کے دوران دلہن اچانک دل کا دورہ پڑنے سے موت کے منہ میں چلی گئی، اہل خانہ نے فوری طور پر سخت فیصلہ کرتے ہوئے تقریب کو جاری رکھا۔
بھارتی ریاست اتر پردیش کے شہر ایٹواہ میں ایک افسوسناک واقعہ پیش آیا جہاں عین شادی کے موقع پر دلہن کو دل کا دورہ پڑا جو جان لیوا ثابت ہوا اور وہ اسپتال پہنچنے سے قبل چل بسی۔
بھارتی میڈیا کے مطابق اترپردیش کے ایٹواہ شہر میں ہندو شادی روایت کے تحت اپنے ہونے والے شوہر منجیش کمار کے ساتھ پھولوں کی مالا کا تبادلہ کرنے کے بعد دلہن جس کا نام سروبھی بتایا گیا ہے کو دل کا دورہ پڑا۔
ایسے خوشی کے موقع پر اس طرح کے ناگہانی واقعے کی کسی کو بھی توقع نہیں تھی اس صورتحال میں تقریب کے شرکاء بھی حیران و پریشان کھڑے تھے۔
دلہن کی حالت دیکھتے ہوئے فوری طور پر قریبی ڈاکٹر کو بلایا گیا تاہم ڈاکٹر نے ابتدائی چیک اپ کے بعد لڑکی کی موت کی تصدیق کردی اور اسے اسپتال لے جانے کی بھی نوبت نہ آسکی۔
اس غم کی صورتحال میں لڑکا اور لڑکی کے اہل خانہ نے ایک تکلیف دہ فیصلہ کیا، شادی کی تقریب روکنے کے بجائے تھوڑے بحث و مباحثے کے بعد طے پایا کہ دلہن سروبھی کی موت کے بعد اس کی چھوٹی بہن نشا سے دولہا منجیش کمار کی شادی کردی جائے۔
اس حوالے سے لڑکی کے ماموں نے میڈیا سے گفتگو کرتے ہوئے بتایا کہ وہ لمحہ ہمارے لیے بہت تکلیف دہ تھا جب ایک کمرے میں دلہن کی لاش رکھی تھی جبکہ دوسرے کمرے میں اسی کی بہن کو دلہن بنایا جارہا تھا۔
مرنے والی لڑکی کے بھائی سروبھ نے کہا کہ ہم نے اس طرح کے ملے جلے جذبات کبھی نہیں دیکھے کہ ایک بہن کی موت کا غم اور دوسری بہن کی شادی جس پر ہمارے خاندان میں ابھی بھی عجیب سی کیفیت طاری ہے۔
