لندن: برطانوی حکومت نے کرونا وائرس سے صحتیاب مریضوں کے پلازمہ سے علاج کی اجازت دے دی۔
اے آر وائی نیوز کی رپورٹ کے مطابق برطانوی حکومت کی جانب سے این ایچ ایس اسپتال کو پلازمہ کے کلینیکل ٹرائل شروع کرنے کی اجازت دی گئی ہے، این ایچ ایس صحتیاب ہونے والے مریضوں سے رابطہ کرے گا۔
برطانوی حکومت کا کہنا ہے کہ کرونا وائرس سے صحتیاب مریضوں سے پلازمہ عطیہ کرنے کی اپیل کی جائے گی، صحتیاب افراد پلازمہ عطیہ کرنے کے لیے آن لائن رجسٹریشن کراسکتے ہیں۔
رپورٹ کے مطابق پلازمہ سے علاج کی کامیابی کی صورت میں ہر ہفتے 5 ہزار مریض صحتیاب ہوں گے۔
واضح رہے کہ پاکستان سمیت دنیا بھر میں پلازمہ کو علاج کے لیے استعمال کرنے سے متعلق تجربات ہورہے ہیں۔
امریکا میں محض تین ہفتوں میں سائنسدانوں نے ملک بھر میں ایک منصوبہ ترتیب دیا ہے جس کے تحت اس وقت 600 سے زائد مریضوں کا علاج کیا جاچکا ہے۔
مائیو کلینک کے پروفیسر مائیکل جوائنر اس منصوبے کی سربراہی کررہے ہیں، ان کا کہنا تھا کہ پہلے ہفتے کے دوران جو چیز ہم نے سیکھی ہے وہ یہ کہ حفاظتی اعتبار سے اور اس انجکشن لگانے سے کوئی منفی اثرات بھی مرتب نہیں ہوئے۔
انہوں نے کہا کہ ایسے شواہد ملے ہیں جن سے یہ پتا چلتا ہے کہ آکسیجن کی فراہمی میں بہتری کے ساتھ مریضوں کی صحت میں بھی بہتری دیکھنے میں آئی ہے تاہم ابھی پلازمہ کے بارے میں ایسا بہت کچھ ہے جس کے بارے میں ہمیں معلوم نہیں ہے۔
پروفیسر مائیکل جوائنر کے مطابق آئندہ ہفتوں میں ہم یہ جان سکیں گے کے پلازمہ میں کیا ہے، اس کے اجزا کیا ہیں، باقی چیزوں کے علاوہ اینٹی باڈی لیول کیا ہوتا ہے۔
