پشاور: خیبرپختون خواہ کے دارالحکومت میں بس ریپڈ ٹرانزٹ (بی آر ٹی) منصوبہ شروع ہونے کے بعد پرانی ویگنوں اور ڈبلیو گیارہ بسوں میں عوامی سواری کا رجحان تقریباً ختم ہوگیا۔
اے آر وائی نیوز کے مطابق بی آر ٹی پشاور کا ڈبلیو گیارہ بسیں اور پرانی فورڈ ویگنوں کو کباڑ (اسکریپ) کرنے کا منصوبہ کامیابی کے ساتھ جاری یے۔
ٹرانس پشاور کے ترجمان محمد عمیر خان کے مطابق بی آر ٹی جیسے جدید سفری سہولت کے بعد صوبائی دارالحکومت پشاور میں چلنے والی پرانی دھواں چھوڑنے والی بوسیدہ ڈبلیو گیارہ ٹائپ منی بسوں اور ویگنوں کو مرحلہ وار اسکریپ کرنے کا سلسلہ جاری ہے۔
ان کا کہنا تھا کہ شہر کو فضائی آلودگی سے پاک رکھنے اور عوام کو بہترین سفری سہولیات کی فراہمی کے لئےاب تک 226 پرانی بسوں اور ویگنوں کو اسکریپ کیا جا چکا ہے۔
محمد عمیر خان کا کہنا تھا کہ اسکریپ ہونے والی تمام گاڑیوں کے مالکان کو طے شدہ قیمت کے مطابق ادائیگیاں بھی کردی گئیں ہیں جبکہ پرانی گاڑیوں کو تمام قوائد و ضوابط کے تحت مرحلہ وار سکریپ کیا جارہا ہے۔
ٹرانس پشاور کے ترجمان کے مطابق بی آر ٹی پشاور کے سفری اعداد و شمار میں اضافہ شہریوں کا بی آر ٹی پر انحصار اور اعتماد کا ثبوت ہے۔ بی آر ٹی جیسی جدید بسوں کے بعد ان پرانی بسوں اور ویگنوں میں مسافروں کا سفر کرنا ناممکن تھا کیونکہ شہر میں اب بہترین سفری انتظام بی آر ٹی کی صورت میں شہریوں کے لیے موجود ہے۔
