اسلام آباد : آئندہ مالی سال کے وفاقی بجٹ میں عوام کو صحت کی سہولیات کی فراہمی کیلئے وزارت صحت کے 38 منصوبے شامل کیے گئے ہیں۔
اس حوالے سے ذرائع کا کہنا ہے کہ وزارت صحت کیلئے 23 ارب 94 کروڑ 75 لاکھ 9 ہزار کے فنڈز مختص کیے ہیں۔
دستاویزات کے مطابق پمز اسپتال کیلئے 4 ارب 62 کروڑ 81 ہزار روپے، پمز اسپتال برن سینٹر کیلئے 25 کروڑ 8 لاکھ 23 ہزار روپے اور پمز اسپتال کالج آف نرسنگ کیلئے 11 کروڑ 30 لاکھ 76 ہزار روپے مختص کیے گئے ہیں۔
اس کے علاوہ پمز امراض قلب مرکز کیلئے 35 کروڑ 86 لاکھ 85 ہزار روپے، پولی کلینک کیلئے 3 ارب 10 کروڑ 31 لاکھ 7 ہزار روپے اور فیڈرل جنرل اسپتال چک شہزاد کیلئے 29 کروڑ 88 لاکھ 68 روپے مختص کیے گئے ہیں۔
قومی ادارہ برائے بحالی معذوراں کیلئے 40 کروڑ 80 لاکھ 86 ہزار روپے، پارلیمنٹ ہاؤس و لاجز اور سرکاری ڈسپنسریز کیلئے 16 کروڑ 50 لاکھ روپے اور فیڈرل میڈیکل و ڈینٹل کالج اسلام آباد کیلئے 19 کروڑ 50لاکھ روپے مختص کیے گئے ہیں۔
دستاویزات کے مطابق اسلام آباد ہیلتھ کیئر ریگولیٹری اتھارٹی کیلئے 10 کروڑ روپے، ڈرگ ریگولیٹری اتھارٹی پاکستان کیلئے 3 کروڑ 32 لاکھ روپے اور آئیسولیشن اسپتال و انفیکشیس ٹریٹمنٹ سینٹر کیلئے 18 کروڑ 87 لاکھ روپے مختص کیے گئے ہیں۔
