The news is by your side.

Advertisement

’بنٹی ببلی‘ نے جنرل اسٹور کے بعد دودھ کی دکان بھی لوٹ لی (ویڈیوز بچے نہ دیکھیں)

کراچی: شہر قائد کے جنوبی ضلع میں ایک برقع پوش خاتون اور سفید شلوار قمیض اور ٹوپی پہنے مرد کی جوڑی نے خوف و ہراس پھیلا دیا ہے، اس ‘بنٹی ببلی’ جوڑی نے جنرل اسٹور کے بعد دودھ کی دکان بھی لوٹ لی،جس کی ویڈیوز اے آر وائی نیوز نے حاصل کر لی ہیں۔

تفصیلات کے مطابق ڈسٹرکٹ ساؤتھ میں ڈکیت جوڑے بنٹی اور ببلی کا خوف پھیل رہا ہے، کلفٹن بلاک 4 میں مسلح برقع پوش خاتون اور مرد نے ایک جنرل اسٹور کو لوٹ لیا، اس کے بعد دودھ کی ایک دکان بھی لوٹ لی۔

کراچی کا ڈسٹرکٹ ساؤتھ جرائم پیشہ عناصر کے نشانے پر ہے، سفید کرولا کے بعد بنٹی اور ببلی نے خوف پھیلانا شروع کر دیا، کلفٹن سی ویو کے قریب جنرل اسٹور پر کی گئی واردات کی سی سی ٹی وی فوٹیج میں دیکھا جا سکتا ہے کہ واردات کیسے کی گئی۔

فوٹیج کے مطابق سفید شلوار قمیض اور ٹوپی پہنا ڈکیت اندر داخل ہوا، اور کیش کاؤنٹر سے مٹھیاں بھر بھر کر رقم نکالنے لگا، اسے دکان میں جو چیز پسند آئی جیبوں میں بھرتا رہا، دونوں ڈکیت دکاندار کے موبائل فون اور دیگر کیش کارڈز بھی لوٹ کر لے گئے۔

اس دوران مسلح برقع پوش خاتون دکان کے باہر کھڑی رہی، ڈکیت نے کیش اور دیگر سامان بھر کر خاتون کو دیا، اور اس نے طالبہ کی طرح بیگ کندھے پر لٹکایا اور باہر چلی گئی۔

دکان دار کا کہنا تھا کہ یہ 2 رکنی ڈکیت گروہ مسلسل وارداتیں کر رہا ہے، دکان دار نے دیگر دکان داروں کو ہوشیار رہنے کا بھی مشورہ دیا۔

دوسری جانب ڈسٹرکٹ ساؤتھ میں بنٹی اور ببلی نے ایک اور واردات میں دودھ کی دکان بھی لوٹ لی، فوٹیج میں دیکھا جا سکتا ہے کہ خاتون نے پہلے دکان دار سے جوس مانگا، وہ جیسے ہی پلٹا ڈکیت مرد نے پستول نکال لی، اور خاتون ڈکیت دکان کے دروازے پر پہنچ گئی۔

فوٹیج کے مطابق مسلح ڈکیت نے اسلحے کے زور پر دکان کا دروازہ کھلوایا، جب کہ خاتون پستول پکڑ کر باہر کھڑی رہی اور اس کا ساتھی لوٹ مار کرنے لگا، دکاندار کی جانب سے مزاحمت کی بھی کوشش کی گئی، تاہم ڈکیت نے پیچھے آنے کی صورت میں گولی مارنے کی دھمکی دی اور فرار ہوگئے۔

Comments

یہ بھی پڑھیں