چمن : صوبہ خیبر پختونخوا میں انتہائی سرد موسم میں دہکتے کوئلے پر بننے والی سبز چائے شہریوں کا مرغوب مشروب ہے۔
چمن سمیت شمالی بلوچستان ان دنوں شدید سردی کی لپیٹ میں ہے، اس کی شدت کو کم کرنے کیلئے شہریوں نے قہوہ خانوں کا رخ کرلیا ہے جہاں دہکتے ہوئے کوئلوں پر بنی چائے ذوق و شوق سے پی جاتی ہے۔
جگہ جگہ چائے خانوں میں لوگوں کا رش نظر آتا ہے۔ پشتونوں کی یہ روایتی سبز چائے نہ صرف کوئلے پر بنتی ہے بلکہ یہ مٹی کے برتن میں الائچی اور ادرک ڈال کر بنائی جاتی ہے جس کے سبب اس چائے کا اپنا ذائقہ اور مزہ ہوتا ہے۔
اے آر وائی نیوز چمن کے نمائندے اختر گلفام کی رپورٹ کے مطابق شہریوں کا کہنا ہے کہ یہ چائے سردی میں بہت فائدہ دیتی ہے اس سے جسم گرم رہتا ہے ہم اسے بہت شوق سے پینے آتے ہیں۔
یاد رہے کہ سبز چائے نہ صرف وزن کی کمی کے حوالے سے مشہور ہے بلکہ صحت کے حوالے سے دیگر فوائد کے لیے بھی معروف ہے۔ یہ نظام ہاضمہ میں مدد دینے کے ساتھ قوت مدافعت میں اضافہ کرتی ہے، ذہن کو پرسکون اور دل و دماغ کی صحت کے لیے بھی بہت مفید ہے۔
بلاشبہ سبز چائے روایتی چائے اور کافی کے مقابلے میں صحت کے لیے مفید ہے لیکن اس کا قطعی یہ مطلب نہیں کہ آپ اسے دن بھر پیتے رہیں، حیرت انگیز طور پر آپ سبز چائے پینے کے لیے جس وقت کا انتخاب کریں اسی سے آپ اس کی مثبت اور منفی اثرات کا اندازہ لگاسکیں گے۔
